Соҳибкорони вилояти Хатлон аз корхонаҳои истеҳсолии ноҳияи Мастчоҳ дидан карданд

Март 16, 2023 11:17

ДУШАНБЕ, 16.03.2023 /АМИТ «Ховар»/. 15 март ҳайати соҳибкорону роҳбарони ширкатҳои тиҷоратии вилояти Хатлон аз корхонаҳои истеҳсолии ноҳияи Мастчоҳ дидан намуд, хабар медиҳад АМИТ «Ховар» бо истинод ба дафтари матбуоти Раиси ноҳияи Мастчоҳ.

Соҳибкорон сараввал аз корхонаи коркарди шири «Нури Сафар» дидан намуданд. Корхона филиали Ҷамъияти саҳомии пӯшидаи «Комбинати шири Душанбе» дар ноҳияи Мастчоҳ буда, ба истиқболи сазовори ҷашни 30-солагии Истиқлоли давлатии Ҷумҳурии Тоҷикистон таъсис ёфтааст.

Иттилоъ дода шуд, ки корхона ҷиҳати афзун намудани ҳаҷми истеҳсоли маҳсулот ширро аз аҳолӣ харида, аз он 15 намуд маҳсулоти босифати ширӣ, аз ҷумла равғани маска, панир, сметана, қаймоқ, ҷурғот, чакка, кефир ва фаллаи шир истеҳсол менамояд. Корхона имкон дорад, ки дар як шабонарӯз аз 7,5 то 8 тонна шир коркард намояд.

Ҳамчунин дар корхона дар баробари коркард ва истеҳсоли маҳсулоти ширӣ истеҳсоли зарфҳои пластикии яккарата низ ба роҳ монда шудааст, ки асосан барои маҳсулоти ширии худи ҳамин коргоҳ пешбинӣ шудааст. Дар ҷараёни шиносоӣ махсусан истеҳсоли зарфҳои пластикии яккарата таваҷҷуҳи соҳибкоронро ба худ ҷалб карда, дар робита ба ин ду соҳибкор аз вилояти Хатлон бо роҳбарияти корхонаи коркарди шири «Нури Сафар» барои дастрас намудани зарфҳои пластикӣ шартномаи ҳамкорӣ баст.

Ҳаҷми истеҳсоли маҳсулоти саноатии корхонаи мазкур соли сипаришуда ба 777 ҳазору 700 сомонӣ расида, истеҳсоли зарфҳои пластикии яккарата ба 3 миллиону 401 ҳазору 100 дона расонида шуд.

Дар идомаи сафар меҳмонон аз корхонаи коркарди чормағзи заминии Ҷамъияти дорои масъулияти маҳдуди «Ҷаъфар» дидан карданд. Корхона метавонад дар як сол то 4 ҳазор  тонна маҳсулот коркард намояд. Барои ба роҳ мондани истеҳсолот аз ҷониби муассиси корхона таҷҳизоти зарурӣ аз Чин ва Туркия ворид карда шудааст. Бо ба кор андохтани корхонаи нав коркард ва истеҳсоли маҳсулот дар асоси омӯзиши бозор ба роҳ монда шуда, дар оянда содироти маҳсулоти тайёр низ ба нақша гирифта шудааст.

Соҳибкорони вилояти Хатлон дар ҷараёни сафар инчунин бо фаъолияти фермаи ширию молии Кооперативи истеҳсолии «Олимиён»-и деҳаи Фотеҳободи ноҳияи Мастчоҳ шинос шуданд. Дар ферма парвариши шутурмурғ, чорвои хушзот ва мурғи гӯштӣ ба роҳ монда шудааст. Муассиси корхона дар як вақт дар замини кишоварзии ферма фаъолияти гармхонаро ба роҳ мондааст, ки аз он ҳамасола маҳсулоти тару тозаи сабзавот, хусусан помидор ва бодиринг ба фурӯш мебарорад.

Дар идомаи боздид соҳибкорон бо фаъолияти бузургтарин корхонаи ресандагии ноҳия «Арвис Зелал Текстайл» (собиқ «Олимтекстайлз») аз наздик шинос шуданд. Корхона бо ташаббуси соҳибкорони тоҷику турк ба кор андохта шуда, дар он дар як вақт беш аз 250 нафар, аз ҷумла занону бонувони ноҳия ба кор ҷалб шудаанд. Ҳаҷми истеҳсоли маҳсулоти корхона дар 2 моҳи соли равон ба 12 миллиону 573 ҳазору 900 сомонӣ расидааст.

Пас аз шиносоию боздид соҳибкорон ва роҳбарони ширкатҳои тиҷоратии вилояти Хатлон изҳор доштанд, ки бо корхонаю ширкатҳои тиҷоратии ноҳияи Мастчоҳ ҳамкории самарабахш ба роҳ мемонанд.

АКС: Дафтари матбуоти Раиси ноҳияи Мастчоҳ

Март 16, 2023 11:17

Хабарҳои дигари ин бахш

МАЪРИФАТИ ИСТИФОДАИ НЕРУИ БАРҚ. Чӣ гуна бояд аз он истифода барем?
Соли 2025 дар низоми ҳамлу нақли байналмилалӣ баъзе дигаргуниҳо ба амал меоянд
«Сомон Эйр» модули фармоиши чиптаҳоро ба кор андохт
ИСТИҚЛОЛИЯТИ ЭНЕРГЕТИКӢ. Бо кадом роҳҳо метавон ба он ноил гардид?
Форуми II байналмилалии «Суғд-чорроҳаи роҳи бузурги абрешим» гузаронида мешавад
ТО ШАБАКАҲОИ 5G ИНКИШОФ ДОДАНИ ИНФРАСОХТОРИ РАҚАМӢ. Ҷиҳати пешбурди иқтисоди рақамӣ тақвияти кор дар чанд самти асосӣ таъкид гардид
Амри Президенти Ҷумҳурии Тоҷикистон дар бораи баргузор кардани Озмуни ҷумҳуриявии «Илм-фурӯғи маърифат» дар соли 2025
Сарвари давлат: «То охири соли 2025 пардохтҳои ғайринақдӣ дар соҳаҳои буҷетӣ ва хизматрасониҳои давлатӣ пурра таъмин карда шаванд»
Нақши Паёми Президенти Ҷумҳурии Тоҷикистон ба Маҷлиси Олӣ дар гузаронидани ислоҳоти иқтисодӣ бузург мебошад
РУШДИ ТОҶИКИСТОН ТАВАССУТИ РАҚАМИКУНОНӢ, ЗЕҲНИ СУНЪӢ ВА НИЗОМИ МАОРИФИ ПЕШРАФТА. Бардошт аз Паёми Президенти Ҷумҳурии Тоҷикистон ба Маҷлиси Олӣ
ИСТИҚЛОЛИЯТИ ЭНЕРГЕТИКӢ-ЯКЕ АЗ ҲАДАФҲОИ СТРАТЕГИИ ҲУКУМАТИ ТОҶИКИСТОН. Моҳи майи соли 2027 Тоҷикистон ба истиқлоли комили энергетикӣ ноил мегардад
Эмомалӣ Раҳмон: «Соли 2025 дар вилояти Суғд сохтмони неругоҳи барқи офтобӣ бо иқтидори 200 мегаватт оғоз мегардад»