АҲСАНТ! Вилояти Мухтори Кӯҳистони Бадахшон даъвати ҳарбиро дар як рӯз иҷро кард

ДУШАНБЕ, 01.04.2023 /АМИТ «Ховар»/. Вилояти Мухтори Кӯҳистони Бадахшон нахустин шуда, даъвати баҳории ҷавонписаронро ба сафи Қувваҳои Мусаллаҳи Ҷумҳурии Тоҷикистон иҷро намуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар медиҳад.

Ба ин муносибат, 1 апрел бо иштироки роҳбарияти Вилояти Мухтори Кӯҳистони Бадахшон ва масъулини шаҳру ноҳияҳои вилоят, мақомоти ҳифзи ҳуқуқу тартибот, сарбозону наваскарон, волидайн, собиқадорони меҳнат, роҳбарону кормандони идораву муассисаҳо маросими гусели навдаъватшудагон баргузор гардид.

Нахуст, аз назди Боғи Ғалаба то майдони Театри мусиқию мазҳакавии ба номи М. Назарови шаҳри Хоруғ роҳпаймоии оммавӣ бо ҷалби қишри васеи ҷомеа доир шуд.

Таъкид гардид, ки тайи панҷ соли охир ҷавононписарони далеру шуҷои ватандӯсти Бадахшон ҷиҳати адои қарзи муқаддаси фарзандӣ дар назди Модар-Ватан, бо амри виҷдон, бо ихтиёри худ  ба комиссариатҳои ҳарбӣ ҳозир шуда, барои муҳофизати Ватан омодагии худро нишон медиҳанд. Чунин муносибат ва дарки масъулияти ватандорӣ аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо, аз минбарҳои баланд, баҳои сазовор гирифта, ҷавонони соҳибватани Бадахшон шоёни таҳсини Роҳбарияти олии мамлакат ва умуман ҷомеаи Тоҷикистон гардиданд.

Гуфта шуд, ки Ҳукумати Ҷумҳурии Тоҷикистон, дар асоси дастуру ҳидоятҳои Сарфармондеҳи Олии Қувваҳои Мусаллаҳи  Ҷумҳурии Тоҷикистон, Генерали Артиш муҳтарам Эмомалӣ Раҳмон дар зарфи соҳибистиқлолии мамлакат пояҳои ҳуқуқӣ, кадрӣ, молиявӣ, моддӣ ва техникии ҷузъу томҳои Қувваҳои Мусаллаҳ мустаҳкам гардида, имрӯз ин неруи муқтадир қодир аст, аз ҳама гуна хатарҳо суботи ҷомеа ва хоки муқаддаси ватанро ҳифз намояд.

Вобаста ба вазъи мураккаби сиёсии имрӯзаи ҷаҳону минтақа таъкид карда шуд, ки дар ин росто зиракии сиёсӣ ва ҳушёрии шаҳрвандиро дар ошкор, пешгирӣ ва бартараф намудани ингуна омилҳои хатарзо тақвият дода шавад.

Дар идомаи чорабинӣ наваскарон ва волидони онҳо суханронӣ намуда, сипосу миннатдории худро ба Роҳбарияти олии мамлакат барои фароҳам овардани шароиту имкониятҳои мусоид дар қисмҳои ҳарбӣ баён намуданд.

Дар ин рӯз чанд тан аз навдаъватшудагон, ки курси ронандагиро хатм намуданд, соҳиби шаҳодатномаи ронандагӣ гардиданд.

Сипас, барномаи рангини фарҳангӣ бо беҳтарин рақсу таронаҳои ватандӯстона манзури ҳозирин гардонда шуд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон