Ноиби Президенти БАТР нишондиҳандаҳои макроиқтисодӣ ва низоми бонкии Тоҷикистонро мусбат арзёбӣ намуд

ДУШАНБЕ, 27.04.2023 /АМИТ «Ховар»/. Таҳкими ҳамкории  мутақобилан судманди Бонки миллии Тоҷикистон бо Бонки Аврупоии Таҷдид ва Рушд /БАТР/ дар мулоқоти Раиси Бонки миллии Тоҷикистон Ҳоким Холиқзода бо ҳайати Бонки Аврупоии Таҷдид ва Рушд (БАТР) таҳти роҳбарии ноиби Президенти БАТР оид ба масъалаҳои сиёсӣ ва ҳамкорӣ Марк Боуман дар Душанбе баррасӣ гардид. Дар ин хусус ба АМИТ «Ховар» дар Бонки миллии Тоҷикистон иттилоъ доданд.

Раиси Бонки миллии Тоҷикистон ба ҳайати БАТР барои ҳамкории самарабахши бисёрсола ва дастгирии доимӣ барои рушди иқтисодиёти Тоҷикистон, бахусус пешниҳоди дастгириҳои молиявию техникӣ ба низоми бонкии Ҷумҳурии Тоҷикистон изҳори миннатдорӣ намуда, гуфт, ки «мо дастгирӣ ва кумаки шарикони рушдро дар роҳандозии муколама байни ташкилоти қарзии молиявии Тоҷикистон ва бонкҳои Аврупо дар самти тавсеаи рушди ҳамкории муросилотӣ бо бонкҳои бонуфузи Иттиҳоди номбурда муҳим мешуморем. Ҳамчунин аз мусоидати БАТР ҷиҳати пешниҳоди тавсияҳо дар ин самт шод хоҳем шуд».

Ноиби Президенти БАТР аз ҳамкории судманд изҳори қаноатмандӣ намуда, иброз дошт, ки сарфи назар аз идомаи вазъи ноороми геосиёсии ҷаҳон, ҷорӣ гардидани таҳримҳои иқтисодӣ нисбат ба баъзе давлатҳои шарики савдо нишондиҳандаҳои макроиқтисодии Ҷумҳурии Тоҷикистон ва низоми бонкӣ мусбат арзёбӣ гардида, тайи соли гузашта ва чанд моҳи соли равон ба комёбиҳои назаррас ноил гаштааст.

Мавсуф ҳавасмандии БАТР-ро ҷиҳати иштироки Бонки миллии Тоҷикистон дар барномаҳои иқтисоди «сабз» дар доираи шабакаҳои бонкҳои марказӣ ва нозирон оид ба сабзгардонии низоми молиявӣ (NGFS) изҳор намуд. Солҳои охир Бонки миллии Тоҷикистон ислоҳоти рушди низоми пардохт ва хизматрасонии молиявии рақамиро фаъолона амалӣ намуда истодааст. Дар робита ба ин, бо назардошти равобити муқарраршудаи БАТР ва Корея роҳбарияти Бонки миллии Тоҷикистон мусоидати БАТР-ро дар татбиқи лоиҳаҳои ба нақшагирифтаи Бонки миллии Тоҷикистон бо низоми миллии пардохти Корея KFTC дархост намуд. Таъкид гардид, ки БАТР минбаъд низ дастгирии худро барои татбиқи ислоҳоти фарогир ҷиҳати тавсеаи рушди низоми бонкӣ, ки аз вазифаҳои аввалиндараҷаи Бонки миллии Тоҷикистон ба шумор меравад, идома хоҳад дод.

Мусоҳибон аҳамияти ҷалби кумакҳои техникии БАТР-ро барои таҳкими минбаъдаи механизмҳои танзим ва назорати фаъолияти ташкилоти қарзии молиявӣ, аз ҷумла муайяннамоӣ, идоракунӣ ва коҳиши таъсири хавфҳои молиявӣ, гузаронидани стресс-тестҳои фаъолияти бонкҳо ва низоми назорати бонкӣ дар доираи стандартҳои Базел, сиёсати пулию қарзӣ ва татбиқи воситаҳои пулию қарзӣ, рушди бозори молиявӣ, инкишофи бахши молиявӣ ва тавсеаи дастрасӣ ба хизматрасонии молиявӣ, таҳкими низоми комплаенс, баланд бардоштани иқтидори назорати суғурта дар бахши омори молиявӣ ва таҳлили бозори суғурта ва таҳияву татбиқи низоми муосири идоракунии хавфҳои амалиётӣ дар Бонки миллии Тоҷикистон таъкид намуданд.

Дар анҷом ҷонибҳо ҳавасмандии худро ҷиҳати густариши минбаъда ва таҳкими ҳамкории самарабахш изҳор намуданд.

АКС: Бонки миллии Тоҷикистон