Шумораи фавт аз COVID-19 95 фоиз коҳиш ёфтааст

ДУШАНБЕ, 27.04.2023 /АМИТ «Ховар»/. Директори генералии Созмони умумиҷаҳонии тандурустӣ (СУТ) Тедрос Гебрейесус 26 апрел иттилоъ дод, ки аз оғози соли равон шумораи фавт аз коронавирус ба ҳадди 95 фоиз коҳиш ёфтааст. Бо вуҷуди ин ӯ огоҳ намуд, ки вирус ҳанӯз ҳам хатар дошта, боиси марги инсонҳо мегардад. Тавре АМИТ «Ховар» хабар медиҳад, дар ин хусус АБИ «Казинформ» бо истинод ба «Новости ООН» иттилоъ додааст.

«Мо аз коҳиш ёфтани сатҳи бақайдгирии фавт аз COVID-19 хеле хушҳол шудем. Аммо, тавре ки намунаи нави XBB.1.16 нишон медиҳад, вирус то ҳанӯз ҳам тағйир меёбад ва ҳоло ҳам имкони ба вуҷуд овардани мавҷҳои нави беморӣ ва фавтро дорад», — таъкид намуд Тедрос Адханом Гебрейесус.

Ӯ изҳори умедворӣ намуд, ки соли равон СУТ қатъи ҳолати фавқулодаро дар соҳаи тандурустии ҷомеа, ки бинобар COVID-19 мазмуни байналмилалӣ гирифтааст, эълон медорад.

«Вале ин вирус ба ҳеҷ куҷо нахоҳад рафт ва ҳамаи давлатҳоро мебояд дар қатори дигар бемориҳои сироятӣ бо он мубориза бурданро омӯзанд», — гуфт директори генералии СУТ.

Шаҳлои САДРИДДИН,
АМИТ «Ховар»

АКС: АБИ «Казинформ»