«БЕҲТАРИН ХИЗМАТЧИИ ДАВЛАТӢ АЗ ҲИСОБИ ЗАНОН». Дар Душанбе лоиҳаи ин озмуни ҷумҳуриявиро баррасӣ карданд

ДУШАНБЕ, 24.05.2023 /АМИТ «Ховар»/. Кумитаи кор бо занон ва оилаи назди Ҳукумати Ҷумҳурии Тоҷикистон имрӯз дар шаҳри Душанбе бо мақсади баррасии ҷараёни амалишавии қарори Ҳукумати Ҷумҳурии Тоҷикистон «Дар бораи Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023-2030» ва лоиҳаи Низомномаи Озмуни ҷумҳуриявии «Беҳтарин хизматчии давлатӣ аз ҳисоби занон» ҳамоиши иттилоотӣ доир намуд. Дар ин хусус ба АМИТ «Ховар» дар Кумитаи кор бо занон ва оила хабар доданд.

Ҳукумати мамлакат бо назардошти нақши муассири занону духтарон дар рушди иқтисоди миллии мамлакат ҳамеша масъалаи таъмини ҳуқуқу манфиатҳои онҳоро дар меҳвари сиёсати худ қарор дода, барои беҳбуд бахшидан ба вазъи занон таваҷҷуҳи хосса зоҳир менамояд.

Ҳамзамон таъкид гардид, ки дар партави дастгириву ғамхориҳои пайвастаи давлату Ҳукумати мамлакат заминаҳои қонунгузорӣ ҷиҳати таъмини имконияти баробари мардону занон мустаҳкам гардида, фишангҳои миллии ҳимояи ҳуқуқи занон муайян карда шуд. Ба туфайли ин ғамхории рӯзафзун имрӯз иштироки фаъолонаи занону духтарон ҳамчун неруи фаъолу созанда дар маъракаҳои муҳими давлативу ҷамъиятӣ беш аз пеш эҳсос гардида, онҳо ба сифати аъзои Ҳукумат ва Парлумон, намояндаи мақомоти судӣ, ҳифзи ҳуқуқу тартибот бошарафона масъулияти идоракуниро бар дӯш доранд. Занон имрўз дар баробари сиёсатмадор, вакил, омўзгору табиб, муҳандис, энергетик ва варзишгар будан ҳамчун олиму ихтироъкор, ҳунарманду эҷодкор, хоҷагидору соҳибкор ва муҳофизи ватан шинохта шудаанд.

Иттилоъ дода шуд, ки тибқи супоришҳои паёмҳои қаблӣ танҳо дар ду соли охир ду санади муҳим — Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030 ва Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023–2030 қабул гардид, ки ҳадафи асосии он фароҳам овардани замина ва шароити зарурӣ барои пурра зоҳир намудани қобилияти занону духтарон дар ҳамаи соҳаҳои иқтисоди миллӣ ва ба ин васила таъмини рушди устувори ҷомеа мебошад.

Дар ин замина Ҳукумати Ҷумҳурии Тоҷикистон бо мақсади амалӣ намудани ҳадафҳои Стратегияи миллии рушди Ҷумҳурии Тоҷикистон барои давраи то соли 2030 бо назардошти то ба 30 фоиз расонидани теъдоди хизматчиёни давлатӣ ва то ба 25 фоиз расонидани теъдоди кадрҳои роҳбарикунанда аз ҳисоби занону духтарони болаёқат, ҷалби занон ба раванди қабули қарорҳо ва пешбарӣ намудани занон ба вазифаҳои роҳбарикунанда тадбирҳои зарурӣ меандешад. Тавассути амалӣ шудани ин тадбирҳо аз ҳисоби ҷавондухтарони боистеъдод кадрҳои нав омода гардида, теъдоди занон дар сатҳи қабули қарор боз ҳам зиёд мегардад.

Қисмати дуюми ҳамоишро баррасии лоиҳаи Низомномаи «Беҳтарин хизматчии давлатӣ аз ҳисоби занон» идома дода, ҳайати Комиссия дар ҳузури иштирокдорон барои дар сатҳи баланди ташкилӣ доир намудани озмун ва пешниҳоди номзадҳои арзанда таклифҳо манзур намуд.

АКС аз манбаъҳои боз