Озмоишгоҳи миллии референсӣ ба хотири пешгирии баъзе бемориҳо ташхисро тариқи шиноснома ба роҳ мемонад

ДУШАНБЕ, 04.05.2023. /АМИТ «Ховар»/. Муассисаи давлатии «Озмоишгоҳи миллии референсӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тамсим гирифтааст, ки бо мақсади сари вақт ва дуруст муайян кардани макони зисти муроҷиаткунандагон барои ташхиси бемориҳои зери назорати эпидемиологӣ, аз ҷумла ВНМО (Вируси норасоии масунияти одам), RV (оташак), ҳама намуди гепатитҳо ва кабудсулфа шаҳрвандонро барои ин намуд ташхисҳо танҳо бо пешниҳоди шиноснома қабул намояд.

Тавре ба АМИТ «Ховар» дар маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд, ин тасмим танҳо ба хотири пешгирии паҳншавии беморӣ гирифта шудааст.

Бинобар ин аз шаҳрвандон даъват ба амал оварда  мешавад, ки ҳангоми муроҷиат ба озмоишгоҳ барои ташхиси ВНМО (Вируси норасоии масунияти одам), RV (оташак), ҳама намуди гепатитҳо ва кабудсулфа шиносномаи худ ва фарзандашонро ҳамроҳ бигиранд.

АКС: Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон