Дар Душанбе бо иштироки Ноиби Президенти Бонки ҷаҳонӣ оид ба Аврупо ва Осиёи Марказӣ Антонелла Бассани машварат доир шуд

Июнь 6, 2023 09:26

ДУШАНБЕ, 06.06.2023. /АМИТ «Ховар»/. 5 июн дар шаҳри Душанбе бахшида ба 30-юмин солгарди ҳамкории Ҷумҳурии Тоҷикистон бо Бонки Ҷаҳонӣ бо иштироки роҳбарони вазорату идораҳо, шарикони рушди мамлакат ва ташкилоти ҷамъиятӣ дар мавзӯи «Татбиқи муваффақи Стратегияи миллии рушди Ҷумҳурии Тоҷикистон барои давраи то соли 2030» машварат баргузор гардид. Дар ин хусус ба АМИТ «Ховар» дар Вазорати рушди иқтисод ва савдо хабар доданд.

Чорабиниро Ноиби Президенти Бонки ҷаҳонӣ оид ба Аврупо ва Осиёи Марказӣ Антонелла Бассани ва Ёрдамчии Президенти Ҷумҳурии Тоҷикистон оид ба масъалаҳои иқтисодӣ Неъматулло Ҳикматуллозода ифтитоҳ намуда, оид ба ҳамкории бардавому  судманди дуҷонибаи Ҷумҳурии Тоҷикистон ва Бонки Ҷаҳонӣ ва саҳми назарраси ташкилоти мазкур дар таъмини рушди устувори мамлакат изҳори назар намуданд.

Дар машварат Вазири рушди иқтисод ва савдои Ҷумҳурии Тоҷикистон дар мавзӯи «Стратегияи милли рушди Ҷумҳурии Тоҷикистон барои давраи то соли 2030: дастовардҳо ва афзалиятҳои минбаъда» сухан карда, иброз дошт, ки таҳти сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар давоми солҳои 2016-2022 ҷиҳати тақвият бахшидани муколамаи давлат ва бахши хусусӣ дар сатҳи миллӣ ва минтақавӣ, мутобиқ намудани фазои сармоягузорию соҳибкорӣ ба талаботи меъёрҳои байналмилалӣ, шомил гардидани ҷумҳурӣ ба узвияти СУС, Конвенсияи СММ оид ба эътирофи қарорҳои судҳои арбитражи хориҷӣ, низоми андозбандӣ ва санҷишҳои фаъолияти субъектҳои хоҷагидор, ташкили заминаи ҳуқуқӣ, ташкилии шарикии давлат ва бахши хусусӣ, инчунин  муосиргардонии хизматрасониҳои давлатӣ ба соҳибкорону сармоягузорон як қатор ислоҳоти назаррас анҷом дода шуд.

Иттилоъ дода шуд, ки дар натиҷаи тадбирҳои андешидаи Ҳукумати ҷумҳурӣ дар давоми солҳои 2016-2022 дар ҳамкорӣ бо шарикони рушд устувории макроиқтисодӣ дар мамлакат таъмин гардида, рушди миёнасолонаи ММД зиёда аз 7 фоизро ташкил дод ва ҳаҷми ММД 1,6 маротиба зиёд шуд.

Даромади пулии аҳолӣ дар ин давра 1,9 маротиба афзоиш ёфта, сатҳи камбизоатӣ аз 31,3 фоиз то 26,3 фоиз коҳиш дода шуд ва шумораи соҳибкорон 1,6 маротиба зиёд гардид. Ҳиссаи содирот дар гардиши савдои хориҷӣ аз 20 то 31 фоиз зиёд ва ҳиссаи воридот аз 80 то 69 фоиз кам гардид.

Ҳаҷми истеҳсоли маҳсулоти саноатӣ 1,9 маротиба ва маҳсулоти кишоварзӣ 1,4 маротиба зиёд шуд, ки ин ба таъмини бозори дохилӣ бо маҳсулоти истеҳсоли ватанӣ мусоидат намуд. Ҳамзамон дар ин давра ду агрегати нави НБО –и «Роғун» ба истифода дода шуда, зиёда аз 2000 мегават иқтидорҳои нав ба кор андохти шуд.

Намояндагони шарикони рушд ислоҳоти иқтисодию иҷтимоии гузаронидаи Ҳукумати ҷумҳуриро бо мақсади ноил гардидан ба ҳадафу афзалиятҳои стратегӣ натиҷабахш арзёбӣ намуда, омодагии худро дар татбиқи ислоҳоти минбаъда ва зиёд кардани кумаку дастгириҳои худ барои таъмини рушди устувори иқтисодию иҷтимоӣ ва экологӣ баён доштанд.

АКС: Вазорати рушди иқтисод ва савдои Ҷумҳурии Тоҷикистон

Июнь 6, 2023 09:26

Хабарҳои дигари ин бахш

Гӯсфанди хоҷагии «Сим-Сим» бо вазни қариб 190 кило сазовори «Шоҳҷоиза»-и Фестивал-намоиши «Гӯсфанди зоти ҳисорӣ» гардид
Кишоварзони вилояти Суғд беш аз 131 ҳазор тонна пахта ҷамъоварӣ менамоянд
Аз 1 октябр молу воситаҳои нақлиёти воридотӣ ва содиротӣ тавассути низоми «АСИКУДА-и ҷаҳонӣ» ба расмият дароварда мешаванд
Дар Алмато беш аз 900 тонна маҳсулоти кишоварзӣ аз вилояти Хатлон ба намоиш гузошта шуд
Сокини ноҳияи Ҷайҳун Каримҷон Бутаев 50 сол боз ба анорпарварӣ машғул аст
Дар Шуғнон корхонаи нави истеҳсоли асфалт ба фаъолият оғоз кард
Нақши Тоҷикистон дар таҳкими амнияти ядроӣ ва радиатсионӣ баланд арзёбӣ гардид
Масъалаи таҳвили гази табиӣ аз Узбекистон ба Тоҷикистон дар давраи тирамоҳу зимистон баррасӣ карда шуд
Мутахассисони соҳаи энергетикаи Қирғизистон бо Неругоҳи барқи обии «Роғун» шинос шуданд
Тоҷикистон ва ИМА ҳамкориро дар самти тиҷораткунонии ихтироот тақвият мебахшанд
Дар Қазоқистон Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии Хатлон оғоз мегардад
«Flaynas» ояндаи наздик дар масири Ҷидда-Душанбе-Ҷидда парвозҳои мустақими ҳавоӣ оғоз менамояд