Бахшида ба 35-солагии Истиқлоли давлатӣ дар ноҳияи Рашт иншооти гуногун ба истифода дода шуд

РАШТ, 03.07.2023 /АМИТ «Ховар»/. Ҳафтаи сипаригардида дар ноҳияи Рашт бинои иловагии муассисаи таълимии №49 дар деҳаи Хуфак, бинои маъмурии Ҷамоати деҳоти Аскалон, майдончаи замонавии футбол дар деҳаи Ҷафри Ҷамоати деҳоти Ҷафр ва маркази савдо дар Ҷамоати шаҳраки Навобод мавриди баҳрабардорӣ қарор гирифта, мумфаршкунии роҳҳои дохилии деҳаҳои Шул, Чашмаи Қозии ва Шулеи ноҳия оғоз гардид.   Дар ин хусус  ба хабарнигори минтақавии АМИТ «Ховар» дар  Мақомоти иҷроияи ҳокимияти давлатии ноҳияи Рашт иттилоъ доданд.

Иншооти мазкур  дар раванди корҳои созандагӣ ба истиқболи ҷашни 35-солагии Истиқлоли давлатии Ҷумҳурии Тоҷикистон дар ҳамкорӣ бо аҳолию соҳибкорон ва буҷети маҳаллию шарикони сармоягузор бунёд шудааст, ки мушкилоти нарасидани ҷойи нишаст барои мактаббачагону набудани варзишгоҳои замонавӣ ва  роҳҳои вайрона баратараф шуд.

Тибқи иттилои масъулини Мақомоти иҷроияи ҳокимияти давлатии ноҳияи Рашт,  бахшида ба ҷашни 35-солагии Истиқлоли давлатӣ дар ноҳияи Рашт 275 иншооти гуногун ба нақша гирифта шудааст, ки аз ин шумора дар арафаи ҷашни Рӯзи  Ваҳдати миллӣ 24 иншоот, аз қабили ҳавзи моҳипарварӣ, марказҳои хизматрасонӣ, хатҳои оби нӯшокӣ дар деҳот, мумфаршкунии роҳҳои маҳаллӣ, фермаи мурғпарварӣ дар деҳаи Бунии Суфиён, биноҳҳои иловагии муассисаҳои таълимӣ, майдончаҳои варзишӣ ва дигар иншооти гуногун ба истифода дода шуд.

АКС: Мақомоти иҷроияи ҳокимияти давлатии ноҳияи Рашт