Чаро дар истироҳатгоҳи «Камароб» -и ноҳияи Рашт духтарон ба истироҳат фаро гирифта намешаванд?

Июль 25, 2023 16:59

РАШТ, 25.07.2023 /АМИТ «Ховар»/. Ҳамасола баъди ба таътил баромадани хонандагони муассисаҳои таҳсилоти миёнаи умумӣ дар шаҳру ноҳияҳо истироҳатгоҳҳои тобистона ба фаъолият оғоз менамоянд. Имсол низ дар асоси Қарори Ҳукумати Ҷумҳурии Тоҷикистон «Дар бораи ташкили истироҳати тобистонаи кӯдакон ва наврасон дар соли 2023» дар ноҳияи Рашт истироҳати тобистонаи хонандагон бо назардошти шароиту имконияти мусоид ва ҷавобгӯ ба талаботи замон ташкил карда шуд.

Тибқи иттилои директори истироҳатгоҳи «Камароб»-и ноҳияи Рашт Давлат Ҳусейнзода, соли равон дар ду басти истироҳатгоҳи мазкур 100 нафар кӯдакону наврасон ба истироҳати бофароғат фаро гирифа шудаанд. Дар айни замон дар басти сеюм боз 50 нафар хонандагони муассисаҳои таълимии ноҳия истироҳат доранд.

Мутаассифона, ҳарчанд беҳтарин шароити истироҳат барои кӯдакону наврасон муҳайё гардидааст, вале имсол низ масъулини шуъбаи маорифи Рашт духтаронро барои истироҳат ҷалб накарданд. Ин амал чандин сол аст, ки давом дорад ва духтаракони ноҳияи Рашт аз истироҳати бофароғати тобистона дар истироҳатгоҳи «Камароб» маҳрум мондаанд.

Вобаста ба ин масъала сармутахассиси шуъбаи маорифи ноҳияи Рашт Шералӣ Ҷомиев иброз дошт, ки «бинобар сабаби ҷойи алоҳида набудан барои духтарон дар лагер духтаракон қабул намешаванд. Инчунин он ба волидайни онҳо вобастагӣ дорад».

Дар сохтори маорифи ноҳияи Рашт бар ин андеша ҳастанд, ки истироҳатгоҳи «Камароб» танҳо барои писарон аст ва аз чӣ бошад, ки роҳбарияти ин шуъба ҷиҳати иҷрои Қарори Ҳукумати Ҷумҳурии Тоҷикистон «Дар бораи ташкили истироҳати тобистонаи кӯдакон ва наврасон дар соли 2023» дар бастҳои алоҳида пурра гурӯҳи духтараконро ҷалб ва мақоми онҳоро баробари писарон ҳифз наменамоянд.

Роҳбарияти шуъбаи маорифи ноҳияи Рашт бояд нағз донанд, ки зери сиёсати хирадмандонаи Пешвои миллат муҳтарам Эмомалӣ Раҳмон ҳазорҳо духтарони кӯҳистон тавассуси квотаҳои президентӣ дар донишкадаю донишгоҳҳои олии мамлакат хонда, соҳиби касб гардиданд ва имрӯз ба ҳайси мутахассис дар минтақаҳои кӯҳистони ҷумҳурӣ фаъолият доранд. Ҳамчунин имрӯзҳо ҳазорон нафар духтаракони мактабхон дар истироҳатгоҳҳои тобистонаи ҷумҳурӣ ба итироҳати бофароғат ҷалб гардидаанд, ки онҳо аз хурдсолӣ ғамхориҳои давлату ҳукуматро нисбат ба хеш дарк намуда, бо таассуроти баланди маърифатию фарҳангӣ тарбия ёфта, дар оянда ба ҳайси мутахассис дар рушди соҳаҳои гуногуни мамлакат саҳми арзанда мегузоранд.

Аз ин рӯ роҳбарияти шуъбаи маорифи ноҳияи Раштро зарур аст, ки Қарори Ҳукумати Ҷумҳурии Тоҷикистон «Дар бораи ташкили истироҳати тобистонаи кӯдакон ва наврасон дар соли 2023»-ро эҳтиром намуда, баҳри иҷрои пурраи он гулдухтарони ноҳияи Раштро барои истироҳати бофароғати тобистона ба басти чаҳорум ҷалб намоянд.

Субҳониддини МАҲМУД,
АМИТ «Ховар»

АКС аз директори истироҳатгоҳи  «Камароб»

Июль 25, 2023 16:59

Хабарҳои дигари ин бахш

Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
«Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030» қабул гардид
Татбиқи лоиҳаҳои сармоягузорӣ дар соҳаи таҳсилоти ибтидоӣ ва миёнаи касбӣ бо намояндаи Бонки Осиёии рушд баррасӣ гардид
Дар Душанбе оид ба татбиқи иммунизатсия бар зидди вируси папилломаи одам машварати омӯзишӣ оғоз шуд
Татбиқи лоиҳаи «Беҳтарсозии малакаҳои касбӣ ва имконияти бокортаъминшавӣ» баррасӣ гардид
НЕЪМАТЕ ХУШТАР ЗИ ИСТИҚЛОЛ НЕСТ! Муҳимтарин омили таҳкими истиқлоли Тоҷикистон густариши худшиносию худогоҳии миллӣ аст
Сиёсати иҷтимоии Пешвои миллат такягоҳи суботи иҷтимоӣ ва рушди устувори давлат мебошад
Беш аз 15 ҳазор оилаҳои дар минтақаи зериобшавандаи НБО «Роғун» қарордошта бо манзили доимии зист ва қитъаи замини наздиҳавлигӣ таъмин гардиданд
Тоҷикони муқими шаҳри Толяти аз пешрафту дастовардҳои Тоҷикистон ифтихор менамоянд
Дар Тоҷикистон Рӯзҳои иммунизатсияи иловагӣ бар зидди бемориҳои сурхча ва гулафшон оғоз гардид
Мутахассисон баланд шудани ҳолати ифлосшавии ҳавои атмосфериро дар Тоҷикистон пешгӯӣ менамоянд