ЧЕМПИОНАТИ ҶАҲОН-2026. Дастаи мунтахаби Тоҷикистон марҳилаи интихобиро бо бозӣ ба муқобили дастаи Урдун оғоз менамояд

ДУШАНБЕ, 28.07.2023 /АМИТ «Ховар»/. Дастаи мунтахаби Тоҷикистон оид ба футбол дар даври дуюми марҳилаи интихобии Чемпионати ҷаҳон-2026 нахуст бо тими Урдун рақобат менамояд. Ин бозӣ 16 ноябр дар Варзишгоҳи марказии Душанбе баргузор мешавад. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Тибқи натиҷаи қуръакашии даври дуюми марҳилаи интихобии Чемпионати ҷаҳон-2026 дастаи мунтахаби Тоҷикистон дар гурӯҳи «G» бо дастаҳои Арабистони Саудӣ, Урдун ва ғолиби ҷуфти даври аввали интихобӣ байни дастаҳои Камбоҷа – Покистон рақобат хоҳад кард.

Дар маҷмуъ дар чаҳорчӯби даври дуюми марҳилаи интихобии Чемпионати ҷаҳон-2026 дастаи мунтахаби Тоҷикистон шаш бозӣ – ду вохӯрӣ моҳи ноябри соли равон ва чаҳор бозии дигар моҳҳои март ва июни соли оянда анҷом медиҳад.

Пас аз ҷамъбасти даври дуюми интихобӣ ғолибони нуҳ гурӯҳ ва дастаҳое, ки дар чаҳоргонаи худ ҷойҳои дуюмро мегиранд, муборизаро дар даври сеюми марҳилаи интихобии Чемпионати ҷаҳон-2026 идома дода, ҳамзамон соҳиби роҳхат ба қисмати финалии Ҷоми Осиё-2027 мешаванд.

Ҷоми ҷаҳон-2026. Мусобиқаи интихобӣ

Даври дуюм. Гурӯҳи «G»

Даври 1

16 ноябри соли 2023

ТОҶИКИСТОН – Урдун

Даври 2

21 ноябри соли 2023

Камбоҷа/Покистон – ТОҶИКИСТОН

Даври 3

21 марти соли 2024

Арабистони Саудӣ – ТОҶИКИСТОН

Даври 4

26 марти соли 2024

ТОҶИКИСТОН – Арабистони Саудӣ

Даври 5

6 июни соли 2024

Урдун – ТОҶИКИСТОН

Даври 6

11 июни соли 2024

ТОҶИКИСТОН – Камбоҷа/Покистон

АКС: Федератсияи футболи Тоҷикистон