Дар Душанбе Форуми «Муколама миёни осорхонаҳои Тоҷикистону Русия» доир гардид

Июль 7, 2023 13:38

ДУШАНБЕ, 07.07.2023 /АМИТ «Ховар»/. Дар доираи Рӯзҳои фарҳанги Федератсияи Русия дар Ҷумҳурии Тоҷикистон дар Осорхонаи миллӣ бо иштироки намояндагони осорхонаҳои Тоҷикистон ва осорхонаҳои машҳури Русия Форум таҳти унвони «Муколама миёни осорхонаҳои Тоҷикистону Русия» баргузор гардид. Дар ин хусус ба АМИТ «Ховар» сардори шуъбаи экскурсионӣ ва оммавии Осорхонаи миллии Тоҷикистон Фариддун Кенҷаев иттилоъ дод.

Дар идомаи Форум роҳбарону намояндагони осорхонаҳои Тоҷикистон ва Русия дар мавзуъҳои «Ихтиёриён дар осорхона, корҳои намоишӣ», «Тарғиби коллексияҳои мардумшиносӣ», «Ҳифзи мероси фарҳангӣ», «Барномаҳои фарогир ва кӯдакона» маъруза намуданд.

Имрӯз Форум кори худро идома дода, дар он дигар мавзуъҳои муҳими соҳаи осорхонашиносӣ ва роҳҳои рушди ҳамкорӣ байни осорхонаҳои Тоҷикистон ва Русия таҳлилу баррасӣ мегарданд.

Ҳамчунин дар доираи маҷмӯи чорабиниҳо оид ба рушди ҳамкорӣ байни осорхонаҳои Тоҷикистон ва Русия дар Осорхонаи миллӣ намоиши аксҳо оид ба фаъолияти киностудияи «Тоҷикфилм» таҳти унвони «Сарзамини муқаддас ва муъҷизаофар» ифтитоҳ мегардад.

Директори Муассисаи давлатии «Осорхонаи миллӣ» Зафар Иброҳимзода иброз намуд, ки «дар шароити муосир дар ҳалли масъалаи ҳифзу эҳёи анъанаҳои фарҳангии ҳар як халқу миллат осорхонаҳо мақоми хосаеро ишғол мекунанд. Ин натанҳо ба сабаби оне аст, ки онҳо махзани мероси моддию маънавии ниёгони мардуми ин ё он минтақа мебошанд, балки фаъолияти онҳо ба оммаи мардум нигаронида шудаанд. Инчунин осорхонаҳо дар самти тарбияи қишрҳои гуногуни ҷомеа, баланд бардоштани рӯҳияи ватандӯстӣ, эҳтироми ҳамдигар ва амсоли инҳо нақши муассир доранд».

Ёдовар мешавем, ки 6 июл Рӯзҳои фарҳанги Федератсияи Русия дар Ҷумҳурии Тоҷикистон оғоз гардиданд. Ҳайати 64-нафараи ҳунармандони Русия аз 6 то 11 июл барномаҳои ҳунарии хешро дар шаҳрҳои Душанбе ва Хуҷанд баргузор менамоянд.

Ҳунармандони бомаҳорати Русия дар ҳайати пианинанавози машҳур, Ҳунарпешаи халқии Русия Денис Матсуев, ки имрўз ба Тоҷикистон омад, Ансамбли давлатии академии рақси халқии «Налмэс» –и Ҷумҳурии Адигея дар ин рӯзҳо бо барномаҳои ҷолибу диданӣ хотири тамошобинонро болида мегардонанд.

Тибқи барнома, ифтитоҳи расмии Рӯзҳои фарҳанги Федератсияи Русия дар Ҷумҳурии Тоҷикистон ва консерти пианинанавози машҳур 7 июл, соати 19:00 ва барномаи консертии Ансамбли давлатии академии рақси халқии «Налмэс» 9 июл, соати 19:00 дар Театри давлатии академии опера ва балети Тоҷикистон ба номи Садриддин Айнӣ баргузор мегардад. Ҳамзамон 7 июл, соати 11:00 ифтитоҳи намоиши Вазорати фарҳанги Федератсияи Русия ва соати 11:30 муколама байни осорхонаҳои Тоҷикистону Русия доир карда мешаванд.

Тибқи барномаи баргузории чорабинӣ, сафари иштирокчиёни Рӯзҳои фарҳанги Федератсияи Русия ба шаҳри Хуҷанд 10 июл шуруъ гардида, барномаҳои ҳунарӣ 11 июл дар Театри давлатии мусиқӣ-мазҳакавии ба номи Камоли Хуҷандӣ баргузор мешаванд.

Бояд гуфт, ки ҳайати меҳмонон аз Осорхонаи миллии Тоҷикистон, Китобхонаи миллии Тоҷикистон, Кохи Наврӯз, «Боғи Ирам» ва дигар мавзеъҳои ҷолиби пойтахт ва шаҳри Хуҷанд дидан менамоянд.

АКС: Осорхонаи миллии Тоҷикистон

Июль 7, 2023 13:38

Хабарҳои дигари ин бахш

Дар Академияи миллии илмҳои Тоҷикистон Озмоишгоҳи нави харитасозии радиатсионӣ ифтитоҳ гардид
Маърузаи олими тоҷик доир ба ҳифз ва рушди анъанаҳои миллии фарҳанг ва санъат дар ҷаҳон соҳиби ҷоизаи махсус гардид
Ҳайати мақомоти зиддикоррупсионии Узбекистон бо таъриху фарҳанги миллати тоҷик шинос шуд
Китоби академик Фарҳод Раҳимӣ доир ба ташаббусҳои Президенти Тоҷикистон, пиряхҳо ва иқлим ба нашр расид
Дар Маркази рушди инноватсионии илм ва технологияҳои нав системаи гармидиҳӣ насб мегардад
Ҷаласаи Кумитаи тадорукоти Синамоҷашнвораи дуюми байналмилалии Душанбе «Тоҷи Сомон» баргузор гардид
НИШАСТИ МАТБУОТӢ. Имсол Донишкадаи давлатии санъати тасвирӣ ва дизайни Тоҷикистонро 332 донишҷӯ хатм намуд
Банаворгирии филми муштараки Тоҷикистону Узбекистон бо номи «Дурахши ахтарон: Ҷомӣ ва Навоӣ» оғоз ёфт
«ПЕШВО, ҲИЗБ, МИЛЛАТ». Бахшида ба 30-солагии таъсиси ҲХДТ андешаҳои шахсиятҳои шинохтаи дунё ба нашр расид
НИШАСТИ МАТБУОТӢ. Донишҷӯёни Консерваторияи миллӣ дар озмунҳои байналмилалӣ ҷойҳои намоёнро гирифтанд
Дар муассисаҳои илмию таҳқиқотии Академияи миллии илмҳои Тоҷикистон 8 озмоишгоҳи нав ба истифода дода шуд
НИШАСТИ МАТБУОТӢ. Донишкадаи давлатии фарҳанг ва санъати Тоҷикистон ихтисоси «Омӯзгорони томактабӣ» таъсис медиҳад