Донишҷӯёни Донишгоҳи миллии Тоҷикистон дар Озмуни байналмилалии корҳои илмию инноватсионӣ ғолиб омаданд

ДУШАНБЕ, 29.07.2023. /АМИТ «Ховар»/. Маротибаи аввал дар Иттиҳоди Давлатҳои Мустақил дар Ҷумҳурии Узбекистон Озмуни байналмилалии корҳои илмию инноватсионӣ баргузор гардид, ки дар он  Донишҷӯёни курси 3-юми факултети муносибатҳои байналхалқии Донишгоҳи миллии Тоҷикистон Муҳаммад Таиров ва Маҳноза Кабирова иштирок намуда, ғолиб омаданд.

 Дар ин хусус АМИТ «Ховар» бо истинод ба Донишгоҳи миллии Тоҷикистон иттилоъ медиҳад.

Ба иттилои манбаъ, донишҷӯёни тоҷик дар номинатсияи «Барои хизматҳо дар соҳаи маориф» бо Шаҳодатнома ва медалу туҳфаҳои хотиравӣ сарфароз гардонида шуданд.

Ректори Донишгоҳи миллии Тоҷикистон Қобилҷон Хушвахтзода ин донишҷӯёнро бо дастоварди навбатияшон самимона табрик намуд.

Ёдовар мешавем, ки имрӯз Донишгоҳи миллии Тоҷикистон дар тамоми самтҳо ба дастовардҳои назаррас ноил гардида истодааст. Ғолибияти донишҷӯёни донишгоҳ дар озмуни байналмилалӣ яке аз комёбиҳо дар ин самт мебошад.

АКС: Донишгоҳи миллии Тоҷикистон