ФУТБОЛ. 24 август рақибони «Истиқлол» дар мавсими 2023/24-и Лигаи чемпионҳои Осиё маълум мешавад

ДУШАНБЕ, 06.07.2023 /АМИТ «Ховар»/. 5 июл Конфедератсияи футболи Осиё (КФО) ҳайати сабадҳои қуръакашии марҳилаи гурӯҳии Лигаи чемпионҳои Осиё-2023/24 оид ба футбол дар минтақаҳои Ғарбу Шарқро эълон намуд. 24 август дар Куала-Лумпур қуръакашии марҳилаи гурӯҳии мусобиқаи бузургтарини бошгоҳҳои Осиё баргузор мешавад. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Аз рӯи натиҷаи қуръакашӣ даҳ гурӯҳ иборат аз чаҳор дастаӣ ташкил мешавад. Марҳилаи гурӯҳии Лигаи чемпионҳои Конфедератсияи футболи Осиё аз шаш давр иборат буда, 18 сентябр оғоз шуда, 13 декабр ба анҷом мерасад. Ҳама дастаҳо дар майдони худ ва дар меҳмонӣ рақобат хоҳанд намуд.

Чемпиони Тоҷикистон «Истиқлол»-и Душанбе пеш аз қуръакашии мавсими нави Лигаи чемпионҳои Конфедератсияи футболи Осиё дар қатори бошгоҳҳои «Ал-Файсалӣ» (Урдун), «Аҳал» (Туркманистон), «Мумбай Сити» (Ҳиндустон) ва чемпиони Ироқ, ки баъдтар муайян  мегардад, шомили сабади сеюм гардид. Ин маънои онро дорад, ки чемпиони Тоҷикистон дар марҳилаи гурӯҳии мусобиқот бо ин бошгоҳҳо бозӣ намекунад.

Бояд гуфт, ки тибқи низомномаи мусобиқот аз рӯи ҷамъбасти марҳилаи гурӯҳӣ ғолибони панҷ гурӯҳ аз ҳар минтақа, инчунин се даста, ки дар чаҳоргонаи худ бо натиҷаи беҳтарин ҷойи дуюмро ишғол мекунад, ба даври 1/8 ниҳоӣ роҳ меёбанд.

Сабадҳои қуръакашии марҳилаи гурӯҳии Лигаи қаҳрамонҳои Осиё-2023/24: 

 Минтақаи Ғарб: 

Сабади 1: «Ал-Иттиҳод» (Арабистони Саудӣ), «Персеполис» (Эрон), «Ал-Садд» (Қатар), «Пахтакор» (Ӯзбекистон), «Ал-Ҳилол» (Арабистони Саудӣ).

Сабади 2: «Сипоҳон» (Эрон), «Ал-Дуҳайл» (Қатар), «Насаф» (Узбекистон), «Ал-Файҳа» (Арабистони Саудӣ), «Нассоҷи Мозандарон» (Эрон).

Сабади 3: «Ал-Файсалӣ (Урдун), «ИСТИҚЛОЛ» (ТОҶИКИСТОН), қаҳрамони Ироқ, «Аҳал» (Туркманистон), «Мумбай Сити» (Ҳиндустон).

Сабади 4: «Ал-Айн» (АМА), ғолиби ҷуфти «Ал-Наср» (Арабистони Саудӣ) – «Шабоб Ал-Аҳли» (АМА)/«Ал-Ваҳдат» (Урдун), ғолиби ҷуфти «Трактор» (Эрон) – «Шарҷа» (АМА)/«Башундара Кингс» (Бангладеш), ғолиби ҷуфти «Ал-Арабӣ» (Қатар) – АГМК (Узбекистон)/«Ал-Сиб» (Уммон), ғолиби ҷуфти «Ал-Вақра» (Қатар) – «Навбаҳор» (Узбекистон).

АКС: Федератсияи футболи Тоҷикистон