Масъулини вилояти Суғд вазифадор гардиданд, ки кишти такрориро ба роҳ монда, аз заминҳои обӣ 3-4 ҳосил ба даст оранд

ДУШАНБЕ, 11.07.2023. /АМИТ «Ховар»/. Роҳбарону мутахассисони вилояти Суғд ва шаҳру ноҳияҳои он вазифадор шуданд, ки ба таври ҳатмӣ кишти такрориро ба роҳ монда, аз заминҳои обӣ 3-4 ҳосил гиранд. Дар ин хусус зимни баргузории машварати корӣ, ки 8 июл таҳти раёсати Сарвари давлат муҳтарам Эмомалӣ Раҳмон дар шаҳри Хуҷанд бо роҳбарияти вилоят ва шаҳру ноҳияҳои он доир гардид, иттилоъ дода шуд.

Президенти мамлакат муҳтарам Эмомалӣ Раҳмон дар машварати корӣ таъкид намуданд, ки вазъи ҷаҳони имрӯза, бархӯрдҳои шадиди сиёсиву низомӣ дар баъзе давлатҳо ва минтақаҳои дунё, тағйирёбии иқлим ва пайомадҳои вазнини он — хушксолӣ ва камобии пайдарҳам зиндагии мардуми сайёраро, махсусан, дар самти таъминот бо маводи ғизоӣ торафт мушкилтар гардонида истодааст.

Таъкид шуд, ки имрӯзҳо мавсими ҷамъоварии ҳосил идома дорад, аз ин рӯ кишоварзон ва ҳар як оиларо зарур аст, ки барои беталаф ҷамъ овардани ҳосил ва захира намудани маҳсулоти кишоварзӣ, аз ҷумла маводи ғизоӣ барои мавсими зимистон диққати аввалиндараҷа диҳанд.

Ёдовар мешавем, ки дар машварати кории пешинаи Сарвари давлат муҳтарам Эмомалӣ Раҳмон бо роҳбарони шаҳру ноҳияҳои вилояти Суғд 31 марти соли равон иброз гарида буд, ки бо сабаби аз кор баромадани шабакаҳои обёрӣ, норасоии об ва корҳои ғайриқаноатбахши хоҷагидорӣ то ҳанӯз дар вилояти Суғд 2100 гектар замин аз гардиши кишоварзӣ берун мондааст.

Президенти мамлакат супориш доданд, ки ин мушкилӣ бояд ҳарчи зудтар бартараф карда шавад.

Ҳамчунин вобаста ба аҳамияти гармхонаҳо дар истеҳсоли маҳсулоти кишоварзӣ дастур дода шуд, ки бунёди гармхонаҳо ва истеҳсоли маҳсулот дар онҳо бо тарзу усул ва истифодаи технологияҳои пешқадам идома дода шавад.

Дар машварат оид ба натиҷаҳои рушди иҷтимоию иқтисодии вилоят дар шаш моҳи соли равон Раиси вилояти Суғд Раҷаббой Аҳмадзода ва раисони як қатор шаҳру ноҳияҳои вилоят ба Сарвари давлат ҳисобот доданд.

АКС аз бойгонӣ