Намояндаи Тоҷикистон дар семинари доварони Конфедератсияи футболи Осиё иштирок дорад

ДУШАНБЕ, 16.07.2023 /АМИТ «Ховар»/. Довари футзали Федератсияи байналмилалии футбол (ФИФА) Суҳроб Сатторов аз Тоҷикистон дар семинари Конфедератсияи футболи Осиё (КФО) барои доварони футзал, ки дар шаҳри Куала-Лумпури Малайзия баргузор шуда истодааст, иштирок  дорад. Дар ин хусус ба АМИТ «Ховар» дар Федератсияи футболи Тоҷикистон хабар доданд.

Барномаи таълим ҳам дарсҳои назариявӣ ва ҳам амалиро дар бар мегирад. Қаблан Суҳроб Сатторов дар семинари доварони Конфедератсияи футболи Осиё аз санҷиши фитнес муваффақона  гузашта буд.

Бояд гуфт, ки Суҳроб Сатторов ба ҳайати довароне, ки бозиҳои мусобиқаи «CAFA Futsal Cup-2023»-ро доварӣ мекунанд, шомил гардид. Мусобиқа аз 23 то 28 июл дар Қасри теннис ва маҷмааи варзиши обӣ баргузор мешавад. Дастаҳои Тоҷикистон, Эрон, Узбекистон, Қирғизистон, Туркманистон ва Афғонистон дар мусобиқа байни дастаҳои миллии футзал иштирок мекунанд.

АСК: Федератсияи футболи Тоҷикистон