Шаҳрвандони Тоҷикистон Академияи давлатии авиатсионии Беларусро хатм намуданд

ДУШАНБЕ, 03.07.2023 /АМИТ «Ховар»/. 30 июн маросими тантанавии супоридани дипломҳо ба хатмкунандагони Академияи давлатии авиатсияи Беларус дар соли 2023 баргузор гардид, ки дар сафи онҳо 13 нафар шаҳрвандони Ҷумҳурии Тоҷикистон низ қарор доштанд. Дар ин хусус ба АМИТ «Ховар» дар Сафорати Тоҷикистон дар Минск хабар доданд.

Сафири Тоҷикистон дар Беларус зимни суханронии табрикотӣ, ба ҷониби Беларус, алалхусус ба роҳбарият ва ҳайати омӯзгорони Академия барои таълиму тарбияи мутахассисони тоҷик дар соҳаи авиатсия изҳори миннатдории самимӣ намуд.

Таъкид гардид, ки хатмкунандагони Академияи давлатии авиатсияи Беларус метавонанд дар рушди соҳаи авиатсияи Тоҷикистон саҳми арзанда гузоранд.

Айни ҳол дар Академияи мазкур  зиёда аз 60 нафар курсантҳои тоҷик таҳсил менамоянд, ки барои гирифтани таҳсилоти босифат ин академияро интихоб намудаанд.

АКС: Сафорати Тоҷикистон дар Беларус