Дар Панҷакент ниммарафони кушоди кӯҳӣ баргузор мегардад

ДУШАНБЕ, 29.08.2023. /АМИТ «Ховар»/. 3 сентябр дар мавзеи Ҳафткӯли шаҳри Панҷакент бахшида ба 32-солагии Истиқлолияти давлатии Ҷумҳурии Тоҷикистон дуюмин ниммарафони кушоди кӯҳӣ баргузор мешавад, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Суғд.

Масофаи ниммарафон 21 километру 97 метр муқаррар шуда, барои иштирок дар он варзишгарон аз тамоми манотиқи мамлакат ва кишварҳои дигар- Қазоқистон, Узбекистон, Қирғизистон, Беларус, Чин, Ҳиндустон ва ғайраҳо даъват шудаанд.

Чорабинии варзишӣ бо ибтикори Мақомоти иҷроияти маҳаллии ҳокимияти давлатии шаҳри Панҷакент, Кумитаи рушди сайёҳии назди Ҳукумати Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раёсати ҷавонон ва варзиши вилояти Суғд, Федератсияи варзиши сабуки Ҷумҳурии Тоҷикистон ва ширкати сайёҳии «Сайри Бӯстон» доир карда мешавад.

Барои ғолибони ниммарафон аз 500 то 5000 сомонӣ мукофотҳои пулӣ пешбинӣ гардидааст.

АКС: манбаъҳои боз