Дар вилояти Суғд ғолибони озмуну олимпиадаҳо ва омӯзгорони онҳо қадрдонӣ гардиданд
ДУШАНБЕ, 27.08.2023. /АМИТ «Ховар»/. Роҳбарияти вилояти Суғд ва Вазорати маориф ва илми Ҷумҳурии Тоҷикистон қариб ба 50 нафар хонандагони муассисаҳои таҳсилоти миёнаи умумӣ — ғолибони озмуну олимпиадаҳо ва омӯзгорони онҳо 345 ҳазор сомонӣ мукофоти пулӣ супориданд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.
Раиси вилояти Суғд зимни суҳбат дар ҳузури омӯзгорону хонандагон бо ёдоварӣ аз ғамхориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф изҳор дошт, ки ҷиҳати таъмини иҷрои ҳидоятҳои созандаи Пешвои миллат солҳои охир аз ҷониби мақомоти иҷроияи ҳокимияти давлатии вилоят иқдоми шоиста амалӣ мегарданд. Маҳз дар натиҷаи заҳмати аҳли маориф ва муносибати ҷиддиву эҷодкоронаи онҳо хонандагони муассисаҳои таҳсилоти миёнаи умумии вилоят дар олимпиадаву озмунҳои ҷумҳуриявию байналмилалӣ фаъолона иштирок намуда, соҳиби мақому ҷоизаҳои ифтихорӣ мегарданд.
Аз ҷумла, дар соли таҳсили 2022-2023 769 нафар хонандагони муассисаҳои таълимии вилоят дар олимпиадаҳои ҷумҳуриявӣ, 63 нафар дар олимпиадаҳои байналмилалӣ ва 489 нафар дар олимпиадаҳои байналмилалии фосилавӣ сазовори ҷойҳои ифтихориву ҷоизаҳо шуданд. Барои сазовор гардидан ба ин дастовардҳо 31 нафар омӯзгорони пешқадаму навовари муассисаҳои таълимии вилоят саҳми арзанда гузоштанд.
Озмунҳо бори дигар собит намуданд, ки истеъдодҳои нодир ба воя расида истодаанд ва мо бояд онҳоро ҳамаҷониба дастгириву ҳавасманд гардонем.
Бояд гуфт, ки мукофотҳо тибқи қарори Раиси вилоят «Дар бораи тадбирҳои ҳавасмандгардонии хонандагон, омӯзгорон ва муассисаҳои таълимии вилоят» супорида шуда, маблағи умумии имсолаи он 345 ҳазор сомониро ташкил медиҳад. Яъне, заҳмати омӯзгорони муассисаҳои таълимӣ ва дастпарварони онҳо, ки ғолиби олимпиадаҳои фаннии байналмилалӣ ва ҷумҳуриявӣ гардидаанд, аз ҷониби давлату Ҳукумат ба таври шоиста арҷгузорӣ мешавад.
Изҳори боварӣ шуд, ки ҳамаи омӯзгорони муассисаҳои таълимӣ ва шогирдони соҳибистеъдоди онҳо минбаъд низ дар озмунҳо иштирок варзида, донишу маҳорати хешро санҷида, дар пешрафти илм, тақвияти ҳисси миллӣ, ватандӯстиву ватанпарварӣ, тавсеаи ҷаҳонбинии илмиву техникӣ ва рушди илмҳои дақиқу табиӣ саҳми муносиб мегузоранд.
АКС: Хадамоти матбуоти Раиси вилояти Суғд
«ИЛМ — ФУРӮҒИ МАЪРИФАТ». Дар Донишгоҳи байналмилалии забонҳои хориҷии Тоҷикистон даври донишгоҳии озмун оғоз шуд
Доир ба иҷрои барномаҳои давлатии соҳаи маориф дар ноҳияи Рашт ҷаласа баргузор гардид
«ТОҶИКИСТОН — ВАТАНИ АЗИЗИ МАН». Дар Донишгоҳи давлатии ҳуқуқ, бизнес ва сиёсати Тоҷикистон даври донишгоҳии озмун доир шуд
Ҷаласаи Комиссияи Озмуни ҷумҳуриявии «Донандаи беҳтарини асарҳои Пешвои миллат» доир гардид
Дар шаҳри Ҳисор маҳфил-озмунҳои «Тоҷикистони ман!» ва «Шоҳномахонӣ» оғоз гардиданд
«ТОҶИКИСТОН — ВАТАНИ АЗИЗИ МАН». Дар ноҳияи Варзоб даври ноҳиявии озмуни ҷумҳуриявӣ доир шуд
«ИЛМ — ФУРӮҒИ МАЪРИФАТ». Дар Донишгоҳи давлатии Бохтар даври муассисавии озмуни ҷумҳуриявӣ доир шуд
Дар Хуҷанд даври якуми Озмуни ҷумҳуриявии «Тоҷикистон — Ватани азизи ман» баргузор шуд
«ФУРӮҒИ МАЪРИФАТ». Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз шуд
Моҳи май даври дуюми Озмуни ҷумҳуриявии «Фурӯғи субҳи доноӣ китоб аст» баргузор мегардад
Моҳи апрел даври якуми Озмуни ҷумҳуриявии «Илм-фурӯғи маърифат» баргузор мегардад
СИЁСАТИ ФАРҲАНГПАРВАРОНАИ ПЕШВОИ МИЛЛАТ – ЗАМИНАИ ГУСТАРИШИ МАЪРИФАТ ВА ХУДШИНОСИИ МИЛЛӢ. Дар ҳошияи Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ
