35-СОЛАГИИ ИСТИҚЛОЛИЯТИ ДАВЛАТӢ. Дар Ҷамоати деҳоти ба номи Исмоили Сомонии Деваштич корҳои ободониву созандагӣ идома доранд

ДУШАНБЕ, 14.10.2023 /АМИТ «Ховар»/. Ба истиқболи 35-солагии Истиқлолияти давлатии Ҷумҳурии Тоҷикистон дар Ҷамоати деҳоти ба номи​ Исмоили Сомонии ноҳияи Деваштичи вилояти Суғд аз ҷониби соҳибкорон марказҳои савдову хизматрасонӣ, нуқтаи хизматрасонии тиббӣ, коргоҳҳои дӯзандагӣ, мағозаҳои хурду калон сохта мешаванд. Иншооти бунёдгардида дорои тарҳу намои зебо буда, ҳар кадоме аз ду ошёна ва таҳхона иборат аст. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Соҳибкорони деҳаи Хуҷаҳои Ҷамоати деҳоти ба номи​ Исмоили Сомонӣ дастуру супоришҳои Пешвои миллат​ муҳтарам Эмомалӣ Раҳмонро сармашқи кор намуда, кӯшиш доранд, ки дар ободии маҳал​ саҳм гузоранд. Дар сурати мавриди баҳрабардорӣ қарор гирифтани 4​ иншоот дар ҳар кадоме аз 15 то​ 20​ нафар сокини маҳаллӣ бо ҷойи кор таъмин мешавад. ​

Раиси вилояти Суғд  бо ҷараёни корҳои ободониву созандагӣ дар Ҷамоати деҳоти ба номи Исмоили Сомонӣ  шинос гардид. Дар маҷмуъ дар ин ҷамоати деҳот то ҷашни бузурги миллиамон бунёди 48​ иншооти таъйиноти гуногун ба нақша гирифта шудааст.​

Раиси вилоят дар суҳбат бо сокинони ҷамоат иброз намуд, ки бо дастгириҳои Пешвои миллат муҳтарам Эмомалӣ Раҳмон имрӯзҳо дар тамоми гӯшаву канори вилоят корҳои ободонӣ вусъат ёфта, саҳми сокинону соҳибкорон низ дар ободонии маҳал назаррас аст. Таъкид шуд, ки бунёдкориҳо минбаъд низ бояд идома ёбанд, то​ шароити зиндагии мардум аз ин ҳам беҳтар гардад.​

АКС: Хадамоти матбуоти Раиси вилояти Суғд