Ҳамкории дуҷонибаи иқтисодиву тиҷоратӣ байни ноҳияҳои Данғараи Тоҷикистон ва Изники Туркия густариш меёбад

ДУШАНБЕ, 24.10.2023.  /АМИТ «Ховар»/. Дар идомаи сафари корӣ ба Ҷумҳурии Туркия Раиси ноҳияи Данғара Исломиддин Раҳмон бо раиси ноҳияи Изники Туркия вохӯрӣ намуд. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Данғара хабар доданд.

Зимни мулоқот густариши ҳамкории дуҷониба дар самтҳои иқтисодиву тиҷоратӣ мавриди баррасӣ қарор дода шуд.

Ёдовар мешавем, ки ҳадаф аз ин сафар таҳкими ҳамкории иқтисодиву тиҷоратӣ, таъсиси корхонаҳои муштарак ва бозомӯзии мутахассисон байни ноҳияи Данғараи Ҷумҳурии Тоҷикистон ва ноҳияҳои иқтисодии Ҷумҳурии Туркия мебошад.

Дар доираи сафари корӣ ҳамчунин  вохӯрии Раиси ноҳияи Данғараи вилояти Хатлон Исломиддин Раҳмон  бо роҳбарияти Палатаи савдо ва саноати вилояти Бурса баргузор гардида, имконияти ҳамкории байниминтақавӣ дар соҳаҳои кишоварзӣ, саноати нассоҷию хӯрокворӣ, инчунин тайёр намудани мутахассисон дар соҳаҳои мухталиф мавриди баррасӣ қарор гирифт.

Дар доираи ин сафар ҳайати ноҳияи Данғара  дар ноҳияи Осмонгазии вилояти Бурса бо фаъолияти корхонаи ресандагӣ ва дӯзандагӣ шинос гардид.

Инчунин Раиси ноҳияи Данғара Исломиддин Раҳмон дар идомаи сафари корӣ дар Ҷумҳурии Туркия бо раиси ноҳияи Османгазии вилояти Бурса вохӯрӣ намуд.

Ҷонибҳо дар ин дидор масъалаҳои густариши ҳамкориро дар самтҳои гуногун мавриди баррасӣ қарор доданд.

АКС: Мақомоти иҷроияи ҳокимияти давлатии ноҳияи Данғара