Дар Агентии хизмати давлатӣ масъалаи номгӯи бемориҳое, ки барои иҷрои уҳдадориҳои мансабии хизматчии давлатӣ монеа мешаванд, баррасӣ гардид

ДУШАНБЕ, 15.10.2023. /АМИТ «Ховар»/. 13 октябри соли равон бо ташаббуси Агентии хизмати давлатии назди Президенти Ҷумҳурии Тоҷикистон дар ҳамкорӣ бо Вазорати тандурустӣ ва ҳифзи иҷтимоии аҳолии ҷумҳурӣ ҷаласаи якуми гурӯҳи кории байниидоравӣ вобаста ба омӯзиши фармоиши якҷояи Раёсати хизмати давлатии назди Президенти Ҷумҳурии Тоҷикистон оид ба номгӯйи бемориҳоеро, ки барои иҷрои уҳдадориҳои мансабии хизматчиёни давлатӣ монеа мегарданд, баргузор гардид. Дар ин хусус ба АМИТ «Ховар» дар Агентии хизмати давлатӣ хабар доданд.

Иттилоъ дода шуд, ки барои таъмини иҷрои талаботи мазкур фармоиши якҷояи Раёсати хизмати давлатии назди Президенти Ҷумҳурии Тоҷикистон ва Вазорати тандурустии Ҷумҳурии Тоҷикистон содир гардида, мавриди амал қарор дода шудааст. Аз қабули санади мазкур муҳлати зиёда аз 10 сол гузашта, бинобар ҳолатҳои дар таҷриба ба қайд гирифташуда,  зарурати такмили он тақозо карда мешавад.

Таъкид гардид, ки бинобар рушди устувори  техника ва навгониҳо дар соҳаи тиб, бознигарӣ намудан ба фармоиши амалкунандаи соҳаи хизмати давлатӣ муҳим буда, дар ин замина мушкилоти мавҷуда рафъ гардида, муроҷиатҳои шаҳрвандон вобаста ба ин масъала роҳи ҳалли худро меёбанд.

АКС: Агентии хизмати давлатии назди Президенти Ҷумҳурии Тоҷикистон