Дар Москва бахшида ба 32-солагии Истиқлоли давлатии Ҷумҳурии Тоҷикистон ва Рӯзи забони давлатӣ барномаи консертӣ доир гардид

ДУШАНБЕ, 06.10.2023. /АМИТ «Ховар»/. 4 октябр дар шаҳри Москва дар доираи сафари ҳунармандони Ҷумҳурии Тоҷикистон таҳти роҳбарии Муассисаи давлатии “Оркестри давлатии симфонӣ”-и Дастгоҳи иҷроияи Президенти Ҷумҳурии Тоҷикистон бахшида ба 32-солагии Истиқлоли давлатии Ҷумҳурии Тоҷикистон ва Рӯзи забони давлатӣ консерти тантанавӣ баргузор гардид. Дар ин хусус ба АМИТ «Ховар» дар Сафорати Ҷумҳурии Тоҷикистон дар Федератсияи Русия хабар доданд.

Дар барнома намояндагони мақомоти давлатии Федератсияи Русия, аҳли  илму фарҳанг, донишҷӯён, инчунин ҳамватанони муқими Русия  иштирок намуданд.

Барномаи пурмуҳтаво ва ҷолиб, ки аз ҷониби ҳайати эҷодӣ омода гардида буд,  ҳозиринро бо фарҳанги пурғановат, мероси маънавӣ, санъат ва анъанаи беназири халқи тоҷик ошно сохт.  Мусиқии ноби тоҷикӣ, оҳангҳои дилнишин ва рақсҳои зебои духтарони тоҷик аҳли нишастро дар фазои зебо ва пурнишоти Тоҷикистон қарор дод.

Дар доираи сафари ҳунармандони Ҷумҳурии Тоҷикистон таҳти роҳбарии Муассисаи давлатии “Оркестри давлатии симфонӣ”- и Дастгоҳи иҷроияи Президенти Ҷумҳурии Тоҷикистон ҳамчунин баргузории барномаҳои консертӣ дар шаҳрҳои Санкт-Петербург ва Уфа дар назар аст.

АКС: Сафорати Ҷумҳурии Тоҷикистон дар Федератсияи Русия