Дар шаҳру ноҳияҳои Кӯлобу Хоруғ, Ваҳдату Ҳисор ва Бохтару Рашт мағозаҳои корхонаи «Қолинҳои Душанбе» кушода мешаванд

ДУШАНБЕ, 31.10.2023. /АМИТ «Ховар»/. Сарвари давлат муҳтарам Эмомалӣ Раҳмон ба масъулони Ҷамъияти дорои масъулияти маҳдуди «Қолинҳои Душанбе» дастур доданд, ки дар шаҳру ноҳияҳои Кӯлобу Хоруғ, Ваҳдату Ҳисор ва Бохтару Рашт низ марказҳои фурӯши қолинҳо таъсис дода шаванд, то сокинон ба қолинҳои замонавӣ дастрасии бештар пайдо намоянд. Дар ин хусус имрўз, зимни ба истифода додани марҳилаи дуюми корхонаи қолинбофии Ҷамъияти дорои масъулияти маҳдуди «Қолинҳои Душанбе», ки бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ баргузор гардид, гуфта шуд.

Зимни ба истифода додани корхонаи мазкур тазаккур дода шуд, ки иқтидори истеҳсолии ҶДММ «Қолинҳои Душанбе» аллакай ба ҳаҷми истеҳсолоти ширкати «Қолинҳои Қайроқум» наздик шудааст, ки ин раванд нишона аз хуб ба роҳ мондани тавлидоти маҳсулот ва рақобатпазир истеҳсол шудани он мебошад.

ҶДММ «Қолинҳои Душанбе» дар пойтахти мамлакат ва дар ноҳияи Ҷалолиддини Балхии вилояти Хатлон мағозаҳои махсуси худро фаъол сохтааст, ки дар он маҳсулоти корхона ба фурӯш гузошта шудааст.

Сарвари давлат муҳтарам Эмомалӣ Раҳмон иқдоми созандагии роҳбарияти ҶДММ «Қолинҳои Душанбе»-ро шоистаи таҳсин хонда, бунёди корхонаи истеҳсоли қолинҳоро дар пойтахти мамлакат ба мақсадҳои давлату Ҳукумати Ҷумҳурии Тоҷикистон дар самти амалисозии ҳадафи муҳими стратегӣ – саноатикунонии босуръати мамлакат ва таъмини ҳарчи бештари сокинон бо ҷойи кори доимӣ созгор арзёбӣ намуданд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»