Дар Суғд давоми нуҳ моҳи соли равон 1 миллиону 107,9 тонна ангишт истеҳсол шудааст

ДУШАНБЕ, 12.10.2023 /АМИТ «Ховар»/. Дар вилояти Суғд давоми давраи ҳисоботӣ- январ-сентябри соли равон 982 ҳазор тонна семент ва 1 миллиону 107,9 тонна ангишт истеҳсол шудааст.​ Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Тавре Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намудаанд: «Рушди соҳаи истихроҷи ангишт ва самаранок истифода бурдани захираҳои табиии мамлакат метавонад дар пешбурди иқтисодиёти ҷумҳурӣ, таъсис ва фаъолияти корхонаҳои саноатӣ саҳми назаррас гузорад».

Бояд гуфт, ки дар бахши энергетикаи мамлакат таъсири ангишт бағоят калон буда, имрӯзҳо рушди соҳаҳои мухталифи хоҷагии халқ, аз ҷумла иқтисодиёту иҷтимоиётро бе истифодаи он тасаввур намудан ғайриимкон аст.

Истеҳсоли ангишт барои таъмини рӯзгори аҳолӣ, алалхусус дар давраи тирамоҳу зимистон ва фаъолияти самараноки иншооти ҳаётан муҳими хоҷагии халқ муҳим аст.

АКС аз манбаъҳои боз