Дастаи мунтахаби Тоҷикистон чемпиони «Ҷоми Мердека-2023» гардид

ДУШАНБЕ, 18.10.2023 /АМИТ «Ховар»/. Шоми дирӯз бозии ниҳоии мусобиқаи 42-юми байналмилалии «Ҷоми Мердека-2023» оид ба футбол байни дастаҳои мунтахаби Малайзия ва Тоҷикистон дар сатҳи баланд баргузор гардид. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Вохӯрии дастаҳои мунтахаби Малайзия ва Тоҷикистон дар Варзишгоҳи миллии Букит Ҷалил дар Куала-Лумпур доир шуда, бо ҳисоби 2 бар 0 ба суди дастаи мунтахаби Тоҷикистон анҷом ёфт. Голҳои Рустам Соиров ва Шаҳром Самиев ба дастаи мунтахаби Тоҷикистон пирӯзӣ оварданд.

Қаблан дастаҳои мунтахаби Малайзия ва Тоҷикистон се бор бо ҳам вохӯрдаанд. Дастаи мо дар ду бозӣ пирӯз шуда, дар як рақобати дигар дастаи мунтахаби Малайзия ғалаба намуда буд.

Ёдовар мешавем, ки соли гузашта дастаи мунтахаби Тоҷикистон дар аввалин иштирокаш дар мусобиқаи байналмилалии «King’s Cup 2022» бар дастаи мунтахаби Малайзия дар Тайиланд ғолиб омада, чемпион гардид.

АКС: Федератсияи футболи Тоҷикистон