Доир ба ташаббусҳои ҷаҳонии Пешвои миллат дар Осорхонаи марказии вилояти Хатлон намоиши асарҳои рассомони тоҷик ифтитоҳ ёфт
ДУШАНБЕ, 12.10.2023 /АМИТ «Ховар»/. Осорхонаи миллии Тоҷикистон 11 октябр ба ифтихори Соли байналмилалии ҳифзи пиряхҳо эълон гардидани соли 2025 дар Осорхонаи вилоятии таърихӣ-кишваршиносии «Авесто», воқеъ дар шаҳри Бохтар таҳти унвони «Инъикоси пиряхҳо дар осори рассомони Тоҷикистон» намоиш ифтитоҳ намуд. Дар ин хусус ба АМИТ «Ховар» сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев иттилоъ дод.
Дар ифтитоҳи намоиш намояндагони Раёсати фарҳанги вилояти Хатлон, роҳбарияту кормандони Осорхонаи вилоятии таърихӣ-кишваршиносии «Авесто», Муассисаи давлатии “Осорхонаи миллӣ”, инчунин омӯзгорон ва донишҷӯёну хонандагони муассисаҳои таҳсилоти миёна ва олии касбии шаҳри Бохтар иштирок намуданд.
Директори Осорхонаи миллии Тоҷикистон Зафаршо Иброҳимзода изҳор намуд, ки пиряхҳо яке аз манбаъҳои асосии обӣ дар тамоми давлатҳо ба шумор рафта, барои бо об таъмин намудани аҳолӣ нақши муҳим доранд. Дар робита ба ин, пешниҳоди навбатии Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба Соли байналмилалии ҳифзи пиряхҳо эълон намудани соли 2025 иқдоми саривақтӣ мебошад, ки аз ҷониби аксар давлатҳои ҷаҳон ҷонибдорӣ ёфтааст.
Зимнан дар намоиш 19 асар аз офаридаҳои мусаввирони тоҷик, ба монанди Хушвахтов Х. «Манзара», Хошмуҳаммадов М. «Дарёи Сурхоб», Серебрянский Б. И. «Манзара. Такоб», Довутов З. «Сарҳади Ватан», Абдураҳмонов И. «Баҳор», Шарипов С. «Ҳушёрӣ», Шарипов Қ. «Оби мусаффо», Файзов К. «Пиряхи Федченко» ва «Пиряхи Бивачний» ба маъраз гузошта шудаанд, ки тамошобинонро бо манзараҳои кӯҳсорон ва зебоиҳои нотакрори мамлакатамон шинос менамоянд.
Дар Тоҷикистон 13 ҳазор пирях мавҷуд аст, ки масоҳати умумии онҳо тақрибан 8,5 ҳаз. км2 буда, қариб 6 фоизи ҳудуди ҷумҳуриамонро ташкил медиҳанд ва дар баландиҳои аз 3500 то 7495 м ҷойгир мебошанд.
Намоиши «Инъикоси пиряхҳо дар осори рассомони Тоҷикистон» дар Осорхонаи вилоятии таърихӣ-кишваршиносии «Авесто» то 27 октябр идома меёбад.
АКС: Осорхонаи миллии Тоҷикистон
Дар Тоҷикистон Рӯзҳои фарҳанги Федератсияи Русия оғоз гардид
Таҳти унвони «Меандешам пас ҳастам» намоиши осори Рассоми халқии Тоҷикистон Сӯҳроб Қурбонов оғоз гардид
Дар Фестивали байналмилалии «Интермузей. БРИКС+» густариши ҳамкорӣ байни осорхонаҳо баррасӣ шуд
Дар Донишгоҳи технологии Тоҷикистон даври якуми Озмуни ҷумҳуриявии «Донандаи беҳтарини асарҳои Пешвои миллат» доир гардид
Бахшида ба 35-солагии робитаҳои бародаршаҳрӣ байни Душанбе ва Санкт-Петербург дар Осорхонаи миллӣ намоиши аксҳо ифтитоҳ ёфт
Аъзои ҳайати шаҳри Санкт-Петербург дар Осорхонаи миллӣ бо давраҳои пурифтихори таъриху фарҳанги бостонии тоҷикон шинос шуданд
Дабири кулли САҲА дар Осорхонаи миллии Тоҷикистон бо тамаддуни миллати тоҷик шинос шуд
Рушди ҳамкории фарҳангии Тоҷикистону Қирғизистон баррасӣ шуд
«…МОДАР ЯКТОСТ, ТОҶИКИСТОН ЯКТОСТ…». Ба зодрӯзи Шоири халқии Тоҷикистон устод Лоиқ Шералӣ 85 сол пур шуд
«МЕАНДЕШАМ, ПАС ҲАСТАМ». Таҳти ин унвон намоиши осори Рассоми халқии Тоҷикистон Суҳроб Қурбонов ташкил карда мешавад
Дар Бишкек маросими тантанавии ифтитоҳи Рӯзҳои фарҳанги Ҷумҳурии Тоҷикистон баргузор гардид
Дар Донишкадаи санъати тасвирӣ ва дизайни Тоҷикистон даврҳои омӯзишии «Эбру», 3D ва колиграфия ифтитоҳ шуданд
