Имрӯз Рӯзи таъсиси Иттиҳоди байналмилалии ҳифзи табиат мебошад

ДУШАНБЕ, 05.10.2023 /АМИТ «Ховар»/. Имрӯз тибқи тақвим Рӯзи таъсиси Иттиҳоди байналмилалии ҳифзи табиат маҳсуб мешавад.

5 октябри соли 1948 Иттиҳоди байналмилалии ҳифзи табиат (ИБҲТ – IUCN — International Union for Conservation of Nature and Natural Resources) таъсис дода шуд, ки қароргоҳаш дар Гланди Швейтсария воқеъ аст, хабар медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Бояд тазаккур дод, ки дар ҳошияи иҷлосияи панҷуми Ассамблеяи Барномаи ҳифзи муҳити зисти СММ 3 марти соли 2022 мулоқоти Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода ва Директори Генералии Иттиҳоди байналмилалии ҳифзи табиат доктор Бруно Оберле баргузор гардид, ки дар он ба масъалаҳои густариши ҳамкории Кумита ва IUCN таваҷҷуҳи махсус дода шуда, самтҳои асосии фаъолият дар соҳаи ҳифзи табиати вуҳуш, намудҳои нодири ҳайвоноту наботот ва гузаронидани чорабиниҳои муштараки байналмилалӣ бо фондҳои ҷаҳонӣ муайян гардиданд.

Директори Генералии Иттифоқи байналмилалии муҳофизати табиат иброз дошт, ки IUCN ният дорад фаъолияти худро дар Тоҷикистон дар самти фаъолияти илмӣ ва нашри муштараки пажуҳишҳои коршиносони IUCN ва мутахассисони тоҷик густариш диҳад.

Иттиҳоди байналмилалии ҳифзи табиат созмони байналмилалии ғайритиҷоратӣ буда, бо пешниҳоди маълумоту хабарҳо доир ба мушкилоти ҳифзи гуногунии биологии сайёра ва тартиб додани феҳристи намудҳои гуногунии биологӣ дар минтақаҳои гуногуни сайёра, ки ба муҳофизати махсус ниёз доранд, дар кишварҳои мухталифи ҷаҳон ҳамоишҳо баргузор менамояд. Ин иттифоқ рисолати худро дар он медонад, ки ба ташкилоти ҷамъиятӣ ва шахсони фаъол барои муҳофизати маҷмуӣ ва гуногунии табиат кумак расонад.

Маҳз Иттиҳоди байналмилалии ҳифзи табиат идеяи таҳияи Китоби Сурхи байналмилалӣ — феҳристи намудҳои ҳайвонот ва набототи дар зери хатар қарордоштаро пешниҳод намуд. Ин ташаббус аз соли 1963 инҷониб амалӣ гардида, ҳамзамон ҳуҷҷати расмии барномавии Иттиҳод «Стратегияи ҷаҳонии ҳифзи табиат» мебошад.

Ҳоло Иттиҳоди байналмилалии ҳифзи табиат дар Маҷмаи Умумии СММ мақоми нозирӣ ва дар ЮНЕСКО мақоми мушовирӣ дошта, 82 мамлакат, 111 муассисаи давлатӣ, беш аз 800 созмони ғайриҳукуматиро муттаҳид намуда, қариб 10 ҳазор нафар олимону мутахассисони 181 давлати ҷаҳон аъзои ин ташкилот мебошанд.

АКС: Кумитаи ҳифзи муҳити зисти назли Ҳукумати Ҷумҳурии Тоҷикистон