ЛИГАИ ЧЕМПИОНҲОИ ОСИЁ-2023/24. Имрӯз «Истиқлол»-и Тоҷикистон бо «Персеполис»-и Эрон бозӣ менамояд

ДУШАНБЕ, 24.10.2023 /АМИТ «Ховар»/. Имрӯз дар шаҳри Теҳрон бозии даври сеюми марҳилаи гурӯҳии Лигаи чемпионҳои Осиё-2023/24 дар чаҳоргонаи «Е» байни дастаҳои «Персеполис»-и Эрон ва «Истиқлол»-и Тоҷикистон баргузор мешавад. Дар ин хусус ба АМИТ «Ховар» дар Федератсияи футболи Тоҷикистон хабар доданд.

Бозӣ дар варзишгоҳи «Озодӣ» баргузор шуда, соати 19:30 ба вақти маҳаллӣ (21:00 ба вақти Душанбе) оғоз мегардад.

Пахши мустақими бозиро мухлисони футбол метавонанд тавассути шабакаҳои телевизионии «Варзиш» ва «Футбол» тамошо намоянд.

Ёдовар мешавем, ки дар даври якум «Истиқлол» ба муқобили «Ал-Дуҳайл» бозиро мусовӣ (0:0) анҷом дода, дар даври дуюм аз «Ал-Наср» бо ҳисоби 3 бар 0 шикаст хӯрд.

Ҳоло пас аз ду давр «Ал-Наср»-и Арабистони Саудӣ бо 6 имтиёз пешсаф аст. «Персеполис» бо 3 имтиёз дар зинаи дуюм қарор дорад. «Ал-Дуҳайл» ва «Истиқлол» бо 1-имтиёзӣ мутаносибан дар зинаҳои охир мавқеъ гирифтаанд.

АКС: Федератсияи футболи Тоҷикистон