Намояндаи Тоҷикистон дар ҷаласаи VIII сатҳи баланди Алянси авруосиёии омбудсменҳо иштирок намуд

Октябрь 19, 2023 20:00

ДУШАНБЕ, 19.10.2023 /АМИТ «Ховар»/. 17-18 октябр Ваколатдор оид ба ҳуқуқи инсон дар Ҷумҳурии Тоҷикистон Умед Бобозода дар ҷаласаи VIII сатҳи баланди Алянси авруосиёии омбудсменҳо, ки дар шаҳри Москваи Федератсияи Русия дар мавзуи «Ҳифзи ҳуқуқи инсон дар самти саломатӣ ва ёрии тиббӣ» доир гардид, иштирок ва маъруза намуд. Дар ин хусус ба АМИТ «Ховар» дар мақомоти Ваколатдор хабар доданд.

Ҳамзамон намояндаи Тоҷикистон дар кори Конфронси  VII байналмилалии илмӣ-амалӣ дар мавзуи «Масоили ҳимояи ҳуқуқи инсон: мубодилаи таҷрибаҳои беҳтарин байни омбудсменҳо» иштирок намуд.

Дар кори конфронс имсол ба ғайр аз аъзои доимии ААО (ЕАО) Арманистон, Тоҷикистон Эрон, Муғулистон, Қазоқистон, Қирғизистон, Узбекистон, Русия ва Сербия омбудсменҳои  Озарбойҷон, Туркманистон, Туркия, Мали, Малави, Баҳрайн, Никарагуа, Ҳабашистон, намояндагон аз Беларус, дар маҷмуъ 37 намояндаи омбудсменҳои давлатҳои хориҷӣ иштирок доштанд.

Дар оғози ҷаласаи сатҳи баланди Алянси авруосиёии омбудсменҳо 17 октябр муроҷиатномаҳои Президенти Федератсияи Русия, Вазири корҳои хориҷӣ ва Вазири тандурустии Федратсияи Русия ба ҳамагон ва иштироккунандагони ҷаласа расонида шуд.

Дар ҷаласаи сатҳи баланд Ваколатдор оид ба ҳуқуқи инсон дар Ҷумҳурии Тоҷикистон дар мавзуи «Ҳифзи ҳуқуқи инсон дар самти саломатӣ ва ёрии тиббӣ дар Ҷумҳурии Тоҷикистон» маъруза намуда, доир ба масъалаҳои мубрами таъмини ҳуқуқ ба саломатӣ ва расонидани кумаки тиббӣ, инчунин татбиқи чораҳо дар сатҳи давлатӣ оид ба таъмини ҳифзи саломатии аҳолӣ аз ҷониби Ҳукумати Ҷумҳурии Тоҷикистон сухан гуфт.

Таъкид гардид, ки дар Ҷумҳурии Тоҷикистон дар соҳаи таъмини ҳифзи саломатӣ ва расонидани ёрии тиббӣ заминаи мукаммали қонунгузорӣ ташаккул ёфтааст. Якчанд барномаҳои давлатӣ ва стандартҳои ҳуқуқӣ барои таъмин ва ҳифзи ҳуқуқ ба саломатӣ дар сатҳи давлатӣ ва минтақавӣ аллакай таҳия шудаанд.

Зимни баргузории ҷаласаи сатҳи баланди Алянси авруосиёии омбудсменҳо ва Конфронси байналмилалӣ Ваколатдор оид ба ҳуқуқи инсон дар Ҷумҳурии Тоҷикистон бо омбудсменҳои давлатҳои иштирокдор вохӯриҳои дуҷонибаи судманд анҷом дод, ки дар ҷараёни он масъалаҳои вазъи ҳуқуқии инсон дар шароити имрӯза, хусусан муҳоҷирони меҳнатӣ баррасӣ шуданд. Инчунин дар доираи мулоқотҳои мазкур  масъалаҳои асосии ҳолати кунунӣ ва дурнамои ҳамкории дуҷонибаи мақомоти Ваколатдор оид ба ҳуқуқи инсон дар Ҷумҳурии Тоҷикистон бо Омбудсмени ин давлатҳо мавриди баррасӣ қарор гирифтанд.

АКС: Ваколатдор оид ба ҳуқуқи инсон дар Ҷумҳурии Тоҷикистон

Октябрь 19, 2023 20:00

Хабарҳои дигари ин бахш

Дар Душанбе вобаста ба иҷрои Барномаи миллии ташаккули тарзи ҳаёти солим ҷаласа баргузор гардид
Дар Душанбе Конфронси ҷумҳуриявӣ таҳти унвони «Ваҳдат – мароми модарон» баргузор шуд
Дар Душанбе вобаста ба хизматрасониҳои молиявӣ ва ҳуқуқи соҳибкорон конфронси ҷумҳуриявӣ доир гардид
Сафари Корвони «Модарони ваҳдатсаро» ба шаҳру ноҳияҳои ҷумҳурӣ оғоз гардид
Дар Озарбойҷон Конфронси байналмилалии ҳизбҳои сиёсӣ баргузор шуд
Фестивали дӯстии ҷавонон-2025 оғоз шуд
Бахшида ба Рӯзи ҷаҳонии донори хун дар Тоҷикистон маъракаи хунсупорӣ гузаронида шуд
Дар Женева масъалаи кушодани марказҳои раводиди давлатҳои Иттиҳоди Аврупо дар Тоҷикистон баррасӣ гардид
Бахшида ба ҷашни Ваҳдати миллӣ Корвони «Модарони ваҳдатсаро» ташкил мегардад
Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид
То соли 2028 ба ҳама шаклҳои бадтарини меҳнати кӯдакон дар Тоҷикистон хотима дода мешавад
Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд