Раиси шаҳри Турсунзода бо корҳои сохтмонӣ дар муассисаи таълимӣ шинос гардид

ДУШАНБЕ, 15.11.2023 /АМИТ «Ховар»/. Дар  шаҳри Турсунзода корҳои  сохтмонии  бинои иловагии Муассисаи таҳсилоти миёнаи умумии рақами 30, воқеъ дар деҳаи Сешанбеи Ҷамоати деҳоти Сешанбе идома дорад, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳр.

Сохтмони бинои иловагии Муассисаи таҳсилоти миёнаи умумии №30 дар асоси Созишномаи грантӣ байни Мақомоти иҷроияи ҳокимияти давлатии шаҳри Турсунзода ва Сафорати Ҷопон дар Тоҷикистон пешбинӣ шудааст.

Тибқи нақша, бинои нави муассиса аз 8 синфхона иборат буда, дар ду баст 400 нафар хонандаро ба таҳсил фаро мегирад.

Бояд гуфт, ки дар замони Истиқлолияти давлатӣ барои рушди соҳаи маориф ва беҳтарсозии шароити таълиму тарбия барои хонандагону омӯзгорон тадбирҳои зарурӣ амалӣ гардида, биноҳои замонавии ҷавобгӯ ба талабот сохта, мавриди истифода қарор дода шуданд.

Ин иқдом барои дар оянда ба камол расидани ҷавонони ватандӯсту ташаббускор ва донандаи забонҳои хориҷӣ заминаи воқеӣ мегузорад.

АКС: Мақомоти иҷроияи ҳокимияти давлатии шаҳри Турсунзода