Таъмири се канали калони шаҳри Хоруғ бо кумаки ширкатҳои сохтмонӣ оғоз гардид

ХОРУҒ, 23.11.2023 /АМИТ «Ховар»/. Дар се канали асосии шаҳри Хоруғ баъди давраи обмонӣ  марҳилаи дуюми корҳои таъмириву навсозӣ бо ҷалби чор ширкати сохтмонии маҳаллӣ оғоз гардид. Тавре ба мухбири минтақавии АМИТ «Ховар» Файз Мирасан дар Мақомоти иҷроияи ҳокимияти давлатии Вилояти Мухтори Куҳистони Бадахшон иттилоъ доданд, ҳадафи он бартараф намудани мушкилоти норасоии оби полезӣ дар фасли баҳору тобистон мебошад.  

Соли дуюм аст, ки баъди анҷоми давраи обмонӣ мавзеъҳои осебпазири ҳар се канал таъмир мешаванд. Зеро ин шабакаи обрасонӣ аз доманакӯҳҳо мегузарад ва зери таҳдиди селу тармаву сангфароӣ қарор дошта, ҳамасола дар фасли баҳор ба таъмир ниёз пайдо менамояд. Соли гузашта бо ҷалби кормандони идораву муассисаҳои давлатии вилоят ва шаҳри Хоруғ, инчунин сокинони Ҷамоати шаҳраки Сомоншаҳр  ва як қисми ноҳияи Роштқалъа дар ҷараёни ҳашарҳои дастҷамъона дар масофаи 300 метр канали обгузари «Додихудо» бетонпӯш гардид.

Сардори шуъбаи беҳдошти замин ва обёрии вилоят Қурбонбек Худоёров ба хабарнигори минтақавии АМИТ «Ховар» гуфт, ки «канал, ки  зиёда аз  12 километр дарозӣ дошта, аҳолии Ҷамоати Сомониёни шаҳри Хоруғро аз оби полезӣ таъмин  менамояд, ҳамасола   бар асари бориши зиёди барфу борон қисматҳои алоҳидаи он тахриб мегарданд ва ҳар сол бо кумаки   Мақомоти иҷроияи ҳокимияти давлатии вилоят ва шаҳри Хоруғ баъди мавсими обёрӣ сари вақт таъмир  мешавад. Таъмиру тармими саривақтии ҳар се канал ба миён омадааст. Канали ба номи Назаршо Додихудоев яке аз каналҳои калонтарини шаҳри Хоруғ аст, ки иқтидори обгузаронии он дар як сония то ба 7 ҳазор метри кубӣ баробар мебошад.  Канали Темур 12 километру 600 метр дарозӣ дошта, аз он бошандагони 8 маҳаллаи шаҳраки Шириншо Шоҳтемури шаҳри Хоруғ  барои обёрии заминҳои наздиҳавлигӣ ва боғот истифода менамоянд».

Ҳоло бо мақсади пешгирии полоиши об ва васеъ намудани наҳри об ширкатҳои сохтмонӣ ба таъмиру навсозӣ дар чор мавзеъ оғоз намуданд. Баъди таъмири ин канал бештар аз 40 гектар  замину боғҳои танҳо  аҳолии Ҷамоати шаҳраки Шириншоҳ Шоҳтемур  то маҳаллаи Фурудгоҳ бо оби полезӣ таъмин мешаванд.

Ширкати сохтмонии маҳаллии «Хонаободони Помир» низ дар айни ҳол ба тахту ҳамворкунӣ ва омодасозии мавзеи ба он вобастагардида машғул буда, сохтмончиён ният доранд, ки то охири моҳи равон минтақаи хатарнокро бетонпӯш ва онро ба мавсими обмонӣ омода намоянд.

АКС: АМИТ «Ховар»