Тоҷикистонро дар Гранд Слами Токио оид ба ҷудо 10 варзишгар муаррифӣ менамоянд

ДУШАНБЕ, 30.11.2023. /АМИТ «Ховар»/. Дастаи мунтахаби ҷудои Тоҷикистон дар мусобиқаи навбатии «World Judo Tour» – Гранд Слами Токио-2023 дар ҳайати 10 нафар иштирок менамояд. Дар ин хусус шореҳи варзиши  АМИТ «Ховар» бо истинод ба Федератсияи ҷудои Тоҷикистон хабар медиҳад.

Мусобиқа 2-3 декабр бо иштироки 500 варзишгари беш аз 84 давлат баргузор мешавад.

Тоҷикистонро дар ин мусобиқаи сатҳи баланд 10 варзишгари шинохта байни мардҳо, аз ҷумла Муҳаммадсолеҳ Қувватов  бо Меҳрзод Суфиев дар вазни  то 60кг, Эмомалӣ Нуралӣ  бо  Обид Ҷебов дар вазни то 66кг, Беҳрӯз Хоҷазода  бо Абубакр Шеров дар вазни то 73кг, Сомон Маҳмадбеков бо Муҳаммадҷон Абдуҷалилзода дар вазни то 81кг, Комроншоҳи Устопириён  дар вазни то 90кг  ва Эмомризо Анварзода дар вазни то 100кг муаррифӣ  менамоянд.

Фонди умумии ҷоизаҳо 154 000 евроро ташкил медиҳад. Ғолибон дар ҳамаи 14 вазн 5000 евро, барандагони медали нуқра 3000 евро ва медали биринҷӣ 1500 евро ҷоизапулӣ дарёфт менамоянд.

АКС: Федератсияи ҷудои Тоҷикистон