Дар ноҳияи Зафаробод бинои хуштарҳу замонавии филиали «Амонатбонк» ба истифода дода шуд

ДУШАНБЕ, 13.12.2023 /АМИТ «Ховар»/. Ба истиқболи 35-солагии Истиқлолияти давлатии Ҷумҳурии Тоҷикистон дар ноҳияи Зафарободи вилояти Суғд бинои хуштарҳу замонавии филиали рақами 28-и Корхонаи воҳиди давлатии /КВД/ «Бонки амонатгузории Ҷумҳурии Тоҷикистон «Амонатбонк» бо иштироки раиси Раёсати бонк, раиси ноҳияи Зафаробод ва намояндагони бахши минтақавии Бонки миллии Тоҷикистон дар вилояти Суғд ба истифода дода шуд.

АМИТ «Ховар» бо истинод ба КВД «Бонки амонатгузории Ҷумҳурии Тоҷикистон «Амонатбонк» иттилоъ медиҳад, ки бинои филиал аз 2 ошёна иборат буда, дорои ҳуҷраҳои барҳавои корӣ, анбор, ошхона ва дигар иншооти ёрирасон мебошад ва барои тақвияти хизматрасонии бонкӣ ба аҳолӣ бо дастгоҳу таҷҳизоти муосири соҳавӣ таъмин шудааст.

Дар маросими ифтитоҳи бино раиси Раёсати КВД «Бонки амонатгузории Ҷумҳурии Тоҷикистон «Амонатбонк» Сироҷиин Икромӣ таъкид намуд, ки баланд бардоштани сатҳу сифати хизматрасонии бонкӣ, риояи қатъии қоидаҳои одоби муошират бо мизоҷон, тарғибу ташвиқи ҳисоббаробаркуниҳои ғайринақдӣ, баланд бардоштани нишондиҳандаҳои молиявӣ ва пешниҳоди ҳарчи бештари қарзҳо ба аҳолӣ, хусусан ба соҳибкорону кишоварзони ноҳияи Зафаробод бояд дар меҳвари таваҷҷуҳи роҳбарону кормандони филиал ва марказҳои хизматрасонии бонкӣ қарор дошта бошад.

АКС: «Амонатбонк»