Дар Тоҷикистон Харитаи равандҳои экзогению геологӣ таҳия мегардад

ДУШАНБЕ, 28.12.2023. /АМИТ «Ховар»/. Саридораи геологияи назди Ҳукумати Ҷумҳурии Тоҷикистон бо истифода аз натиҷаҳои ба дастомадаи муҳандисию геологӣ ва бо нишон додани минтақаҳое, ки зери  таъсири омилҳои хатарноки табиӣ қарор доранд, Харитаи (атласи) равандҳои экзогению геологиии ҷумҳуриро таҳия ва ба Ҳукумати мамлакат пешниҳод намоянд. Чунин дастур дода шуд имрӯз зимни ироаи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, иттилоъ медиҳад АМИТ «Ховар».

Мақсади таҳияи атласи ҷуғрофиро Сарвари давлат барои истҳсоли энергияи сабз, рушди иқтисоди сабз ва паст намудани партови газҳои гулхонаӣ арзёбӣ намуда, ҳамчунин зарур шумориданд, ки  дар самти сармоягузории давлатӣ ва рақамикунонии ҳифзи муҳити зист тадбирҳои иловагӣ амалӣ шавад.

Инчунин Пешвои миллат  ба Саридораи геология супориш доданд, ки фаъолиятро доир ба баланд бардоштани сатҳу сифати омӯзиш, ҷустуҷӯй, иктишоф ва барои истифодаи саноатӣ омода намудани конҳои канданиҳои фоиданок вусъат бахшанд.

Ҳамзамон пешниҳод гардид, ки дар ин самт бояд мутахассисони давлатҳои хориҷӣ ва сохторҳои геологии давлатҳои тараққиёфта ҷалб шуда, баъзе аз конҳо аз нав бо технологияҳои муосир бозомӯзӣ шаванд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»