Дар филиали Донишгоҳи давлатии Москва ба номи М.В. Ломоносов дар шаҳри Душанбе майдони варзишӣ ба истифода дода шуд

ДУШАНБЕ, 06.01.2024. /АМИТ «Ховар»/. Дар филиали Донишгоҳи давлатии Москва ба номи М.В. Ломоносов дар шаҳри Душанбе майдони варзишӣ ба истифода дода шуд, иттилоъ доданд ба АМИТ «Ховар» дар ин донишгоҳ.

Дар расми ифтитоҳи майдон барномаи бошукуҳи варзишӣ, намоиши дастовардҳои варзишгарони ин муассисаи таълимӣ баргузор шуд, ки дар он роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, меҳмонон аз ташкилоту муассисаҳои давлатӣ ва доираи васеи омӯзгорону донишҷӯён иштирок намуданд.

Дар майдони варзишӣ шароити мусоид барои тамрин, машғул шудан ба навъҳои гуногуни варзиш, аз ҷумла футбол, волейбол ва баскетбол муҳайё шудааст. Омӯзгорону донишҷӯён аз ин ба баъд имкон доранд дар ин майдони варзишӣ мусобиқаҳои гуногунро доир намоянд.

Бунёди майдони варзишӣ агар аз як ҷониб имкони хуб барои гузаронидани мусобиқаҳои варзишӣ бошад, аз ҷониби дигар ба тарғиби тарзи ҳаёти солим ва оммавигардонии варзиш дар байни ҷавонону наврасон мусоидат менамояд.

АКС: Донишгоҳи давлатии Москва ба номи М.В. Ломоносов дар шаҳри Душанбе