Дар Хуросон таҳти унвони «Бунёди боғу токзор дар Тоҷикистон» машварати ҷумҳуриявии илмӣ-амалӣ баргузор гардид

ДУШАНБЕ, 15.02.2024 /АМИТ «Ховар»/. Бо мақсади истифодаи дурусти технологияи муосири ниҳолшинонӣ ва нигоҳубину парвариши дарахтон, тоза нигоҳ доштани ҳавои атмосфера ва зебо намудани муҳити атроф дар хоҷагиҳои кишоварзӣ дар ноҳияи Хуросон таҳти унвони «Бунёди боғу токзор дар Тоҷикистон» машварати илмӣ-амалии ҷумҳуриявӣ баргузор гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Хуросон хабар медиҳад.

Дар кори машварати омӯзишии ҷумҳуриявӣ муовини Сарвазири Ҷумҳурии Тоҷикистон, намояндагони Вазорати кишоварзӣ, мутахассисони соҳаи боғу токпарварӣ иштирок намуда, ба мардум дастурҳои методӣ доданд.

Дар машварат ба кишоварзон оид ба дуруст гузаронидани коркарди замин, баланд бардоштани маданияти парвариши дарахтон, ба табиати Тоҷикистон мутобиқат намудани ниҳолҳо ва тарзи дуруст шинонидани онҳо маслиҳатҳои муфид дода шуданд.

Аз ҷумла, таъкид шуд, ки истифодаи техника ва технологияи муосири соҳа ва риояи ҳатмии қоидаҳои агротехникӣ барои рушди соҳаи боғдорӣ ва токпарварӣ дар мамлакат заминаҳои мусоид фароҳам оварда, дар баландшавии нишондодҳои ҳосилнокии замин, махсусан боғу токзор нақши муҳим мегузорад.

АКС: Мақомоти иҷроияи ҳокимияти давлатии ноҳияи Хуросон