Хатмкунандагони Донишгоҳи техникии Тоҷикистон дар Корхонаи коркарди нафти Данғара бо ҷойи кор таъмин мегарданд

Февраль 24, 2024 13:17

ДУШАНБЕ, 24.02.2024 /АМИТ «Ховар»/. Дар Донишгоҳи техникии Тоҷикистон ба номи академик М.С. Осимӣ мулоқоти ректори донишгоҳ Қудрат Давлатзода бо намояндагони ширкати «Тоҷикистон — Петролиум» – Корхонаи коркарди нафти Данғара баргузор гардид.

Тавре ба АМИТ «Ховар» дар Донишгоҳи техникии Тоҷикистон хабар доданд, ҷонибҳо вусъати ҳамкории муассисаҳои таҳсилоти олии касбӣ бо корхонаҳои истеҳсолиро дар самти ҳамгироии илму истиҳсолот, татбиқи натиҷаи корҳои илмӣ-таҳқиқотӣ дар истеҳсолот ва таъмини хатмкунандагон бо ҷойи кори доимӣ омили муҳими омодакунии кадрҳои баландихтисоси соҳаҳои муҳандисӣ ва саҳмгузорӣ дар татбиқи ҳадафҳои рушди миллӣ арзёбӣ намуда, бо таваҷҷуҳ ба ин ҷиҳати бастани шартномаи ҳамкорӣ байни Донишгоҳи техникии Тоҷикистон ба номи академик М.С. Осимӣ ва ширкати «Тоҷикистон — Петролиум» – Корхонаи коркарди нафти Данғара ба мувофиқа расиданд.

Шартномаи ҳамкорӣ бо мақсади танзими маҷмуи муносибатҳои илмию таълимӣ ва таҷрибавии ҳарду ҷониб ба имзо расида, дар доираи он минбаъд ҳамкории дуҷониба тақвият дода мешавад.

Мавзуи меҳварии мулоқот ҷалб ва таъмини хатмкунандагони Донишгоҳи техникӣ бо ҷойи кори доимӣ дар Корхонаи коркарди нафти Данғара буд. Бо назардошти ин Корхонаи коркарди нафти Данғара аз раёсати Донишгоҳи техникӣ тақозо намуд, ки ҷиҳати омода намудани кадрҳои баландихтисос аз рӯйи самтҳои муҳандиси техникаи бехатарӣ, муҳандис-технолог, муҳандис-механик, муҳандиси дастгоҳ, муҳандиси барқ, техник оид ба нигаҳдорӣ ва интиқоли нафт ва маҳсулоти нафтӣ, техник дар стансияи буғӣ мусоидат намуда, дар самти ҷалби собиқ хатмкардагони ихтисосҳои номбаршудаи донишгоҳ ҳамкорӣ намоянд.

Дар ин робита минбаъд хатмкунандагони ихтисосҳои марбутаи донишгоҳ барои таъмин шудан бо ҷойи кор ба Корхонаи коркарди нафти Данғара ҷалб мешаванд.

Дар мулоқот роҳбарияти Донишгоҳи техникӣ ва намояндагони ширкати «Тоҷикистон — Петролиум» – Корхонаи коркарди нафти Данғара ба мувофиқа расиданд, ки дар Корхонаи коркарди нафти Данғара филиали яке аз кафедраҳои донишгоҳ таъсис дода шуда, таҷрибаомӯзии истеҳсолии донишҷӯёни ихтисосҳои марбутаи донишгоҳ дар ин ширкат гузаронида мешавад. Инчунин корҳои илмӣ-таҳқиқотии устодону унвонҷӯёни донишгоҳ ва мавзуъҳои рисолаи хатми бакалаврӣ ва магистрии донишҷӯёну магистрантони ихтисосҳои зарурӣ аз рӯйи самти фаъолияти Корхонаи коркарди нафти Данғара амалӣ  мешавад.

Ба нақша гирифта шуд, ки аз ҷониби Парки технологии донишгоҳ дар Корхонаи коркарди нафти Данғара бо ҷалби аҳолии наздик ба корхона машғулияти омӯзишии касбӣ аз рӯйи самтҳои аппаратчии истеҳсолоти химиявӣ, лаборанти таҳлили химиявӣ, мошинисти таҷҳизоти насосию компрессорӣ, челонгар оид ба таъмири таҷҳизот, харрот, кафшергари барқию газӣ, челонгари барқии асбоби назоратӣ – ченкунӣ ва автоматика, тунукасоз ва изоляторчӣ ва монтёри барқчӣ ташкил намуда, касбу ҳунаромӯзӣ аз рӯйи ин ихтисосҳо амалӣ мешавад.

АКС: Донишгоҳи техникии Тоҷикистон ба номи академик М.С. Осимӣ

Февраль 24, 2024 13:17

Хабарҳои дигари ин бахш

1 июл даври асосии Имтиҳонҳои марказонидаи дохилшавӣ оғоз мегардад
Барои иштирок дар даври асосии Имтиҳонҳои марказонидаи дохилшавӣ беш аз 112 ҳазор нафар довталаб номнавис карда шуд
Аҳлиддин Ибодуллозода: «Тарбияи насли нави ваҳдатофару ваҳдатсаро аз омӯзгорон – меъморони руҳи инсон вобаста аст»
«БЕҲТАРИН ОМӮЗГОР». Фотима Сайдализода дар Озмуни байналмилалии таҳқиқотӣ сазовори дипломи дараҷаи I гардид
Марҳалаи якуми озмуни довталабон барои дарёфти Стипендияи байналмилалии «Дурахшандагон» доир гардид
Байни Донишгоҳи давлатии Бохтар ва Донишгоҳи забонҳои хориҷии Сиани Чин Ёддошти тафоҳум ба имзо расид
Ҳамкорӣ байни муассисаҳои таҳсилоти олии Тоҷикистон ва Узбекистон таҳким меёбад
Дар шаҳри Хуҷанд ғолибони олипиадаҳо ва омӯзгорони беҳтарин қадршиносӣ шуданд
Донишгоҳи давлатии ҳуқуқ, бизнес ва сиёсати Тоҷикистон бо Донишгоҳи давлатии забонҳои хориҷии Сиани Чин лоиҳаҳои инноватсиониро амалӣ менамоянд
Устодони Донишгоҳи техникии Тоҷикистон дар Форуми табодули истеъдодҳои Осиёи Марказӣ иштирок доранд
«Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2026–2030» муҳокима гардид
Таҳти унвони «Эмомалӣ Раҳмон — қаҳрамони ваҳдати тоҷикон» дар Донишгоҳи давлатии омӯзгории Тоҷикистон ҳамоиш доир шуд