КОРХОНАҲОИ БЕКОРХОБИДА ДАР СУҒД. Агар барои ба кор андохтани онҳо тадбир андешида нашавад, аз нав ба тавозуни ҳукумати маҳаллӣ баргардонда мешаванд

Февраль 14, 2024 10:22

ДУШАНБЕ, 14.02.2024 /АМИТ «Ховар»/. Ба ифтихори 35-солагии Истиқлоли давлатии Ҷумҳурии Тоҷикистон дар вилоят бунёду баистифодадиҳии садҳо корхонаи нави саноатӣ ба нақша гирифта шуда, танҳо давоми соли гузашта 269 адад корхонаи нав бо 2455 ҷойи корӣ фаъол гардонида шуд. Он коргоҳҳое, ки солиёни дароз бекор истодаанду соҳибонашон барои ба кор андохтани онҳо чораҷӯӣ намекунанд, шартномаи давлатиашон бекор ва аз нав ба тавозуни ҳукумати маҳаллӣ баргардонда мешаванд. Чунин иброз дошт Раиси вилояти Суғд Раҷаббой Аҳмадзода зимни нишасти матбуотӣ, ки 6 феврали соли 2024 баргузор гардид.

Мавсуф илова намуд, ки соли 2023 дар вилоят 123 корхонаи саноатӣ фаъолият накард, ки сабаби он рақобатпазир набудан ба иқтисоди бозорӣ мебошад.

«Мақомоти иҷроияи ҳокимияти давлатии вилояти Суғд дар соли 2023 ҷиҳати иҷрои дастуру супориш ва ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тадбирҳои зарурӣ андешида, ҳаҷми истеҳсоли маҳсулоти саноатиро ба 26 миллиарду 51,9 миллион сомонӣ расонид, ки нисбат ба соли 2022 бо нархҳои муқоисавӣ 2 миллиарду 923,9 миллион сомонӣ зиёд буда, суръати афзоиш бо назардошти индекси нархҳо 110,7 фоизро ташкил медиҳад»,- гуфт Раҷаббой Аҳмадзода.

Дар нишаст гуфта шуд, ки дар ин давра таваҷҷуҳи асосӣ ба истеҳсоли маҳсулоти воридотивазкунанда ва ба содирот нигаронидашуда равона карда шуд. Аз ҷумла, соли 2023 1 миллиону 297,5 ҳазор тонна семент ва 1 миллиону 417,5 ҳазор тонна ангишт истеҳсол шудааст. Ҳамчунин ба миқдори 298,1 ҳазор тонна орд, 5,5 ҳазор тонна равғани растанӣ, 59,9 ҳазор тонна нон ва маҳсулоти нонӣ, 7,3 ҳазор тонна маҳсулоти макаронӣ, 36 миллиону 315,2 ҳазор қуттии шартӣ консерваҳои гуногун, 14 миллиону 502,0 ҳазор декалитр нӯшокиҳои беспирт истеҳсол карда шудааст, ки нисбат ба ҳамин давраи соли қаблӣ суръати афзоиши истеҳсоли орд 108,6 фоиз, равғани растанӣ 109,5 фоиз, нон ва маҳсулоти нонӣ 113,7 фоиз, маҳсулоти макаронӣ 147,4 фоиз, консерваҳо 120,0 фоиз ва нӯшокиҳои беспирт 134,7 фоизро ташкил медиҳад.

Ёдовар мешавем, ки 13 феврал Раиси вилояти Суғд роҳбарони як қатор корхонаҳои калони вилоятро ба ҳузур пазируфт, ки дар рафти суҳбат масъалаи зиёд намудани ҳаҷми истеҳсоли маҳсулот ва таъмини рушди соҳаи саноат мавриди баррасӣ қарор гирифт.

Раиси вилоят аз ҷумла бо директори тиҷоратии ҶДММ «Анзоб» Толиб Холзода, директори генералии Ширкати куҳӣ-саноатии Тоҷикистону Хитой Як Чжи Сай, директори генералии ҶДММ «ТВЕА Душанбе саноати куҳӣ», Ли Сю Мин, муовини директори генералии ҶДММ «Талко Голд» Шариф Ҷумъазода мулоқот анҷом дода, барои иҷрои уҳдадориҳо ва таъмини рушди соҳаи саноат, зиёд намудани ҳаҷми истеҳсоли маҳсулот, истифодаи пурраи иқтидорҳои истеҳсолӣ, ташкили ҷойҳои нави корӣ, боз ҳам беҳтар намудани шароити коргарон ва саҳмгузорӣ дар бунёди иншооти муҳими иҷтимоӣ вазифагузорӣ намуд.

Таъкид гардид, ки аз ҷониби Ҳукумати Ҷумҳурии Тоҷикистон барои фаъолияти корхонаҳо шароити зарурӣ фароҳам оварда шудааст ва роҳбарони корхонаҳо бояд бо истифода аз имкониятҳо барои зиёд ҳаҷми истеҳсоли маҳсулот чораҷӯӣ намуда, дар татбиқи ҳадафи чоруми миллӣ-саноатикунонии мамлакат саҳми арзанда гузоранд.

Тибқи маълумоти оморӣ, ба ҳолати 1 январи соли 2024 дар ҷумҳурӣ 3444 корхонаи саноатӣ ба қайд гирифта шудааст.

Рухсораи НУР,
АМИТ «Ховар»

АКС: Хадамоти матбуоти Раиси вилояти Суғд

Февраль 14, 2024 10:22

Хабарҳои дигари ин бахш

Ҳайати Тоҷикистон дар Форуми байналмилалии сатҳи баланд оид ба сиёсати сайёҳӣ иштирок намуд
Тавассути нақлиёти автомобилӣ қариб 24,5 миллион тонна бор ва 232,6 миллион нафар мусофир интиқол дода шуд
Президенти Тоҷикистон Эмомалӣ Раҳмон дар шаҳри Душанбе корхонаи бофандагии Ҷамъияти саҳомии кушодаи «Пиллаи тоҷик»-ро ифтитоҳ намуданд
Дар Душанбе вохӯрии минтақавии ниҳодҳои пешбарандаи содироти мамлакатҳои Осиёи Марказӣ баргузор шуд
Пешвои миллат Эмомалӣ Раҳмон дар шаҳри Душанбе Меҳмонхонаи «Кангурт Гранд Ҳотел»-ро мавриди истифода қарор доданд
Ҳайати Тоҷикистон бо раиси Бонки миллии Швейтсария роҳҳои тақвияти ҳамкориро баррасӣ намуд
Сарвари давлат Эмомалӣ Раҳмон дар шаҳри Душанбе бинои бисёрфунксионалӣ бо ҷойгиршавии Меҳмонхонаи чорситорадори «Фирдавсӣ»-ро ифтитоҳ намуданд
Ҳайати Тоҷикистон дар мулоқот бо намояндагони Хазинаи Байналмилалии Асъор масъалаҳои марбут ба низоми бонкиро баррасӣ намуд
Саҳми Бонки ҷаҳонӣ дар татбиқи ислоҳоти сохтории иқтисодиёти Тоҷикистон назаррас арзёбӣ гардид
Намоишгоҳи молу маҳсулоти корхонаҳои саноатии Узбекистон дар маркази ЭКСПО-и шаҳри Душанбе то 21 апрел идома меёбад
АМИТ «Ховар»: Намоишгоҳи маҳсулоти саноатии Ҷумҳурии Узбекистон дар Маркази ЭКСПО-и шаҳри Душанбе 3 рӯз идома меёбад
Дар қаламрави Тоҷикистону Узбекистон қариб 400 корхонаи муштарак фаъолият менамояд