ДАРАХТ БИНШОН! Дар варзишгоҳи марказии ноҳияи Восеъ беш аз 2000 бех дарахти сӯзанбарги ороишӣ шинонида шуд

КӮЛОБ,  17.03.2024. /АМИТ «Ховар»/. Бо ташаббуси Мақомоти иҷроияи  ҳокимияти давлатии ноҳияи Восеъ дар атрофи варзишгоҳи маркази ноҳия зиёда аз 2000 бех ниҳоли сӯзанбарги ороишӣ шинонида шуд.

Тавре сардори шуъбаи ҳифзи муҳити зисти ноҳияи Восеъ Фируз Нуралиев ба АМИТ «Ховар» иттилоъ дод, дар ҳашари ниҳолшинонӣ кормандони ташкилоту муассисаҳо ва кормандони ҳифзи муҳити зисти ноҳия фаъолона иштирок намуданд.

Инчунин дар Ҷамоати деҳоти Абдӣ Авазов, Гулистон, Тугарак, Миралӣ Маҳмадалӣ дарахтони сояафкану ороишӣ шинонида шуданд.

Гуфта шуд, ки дар оянда бо дастгирии Мақомоти иҷроияи ҳокимияти  давлатии ноҳияи Восеъ дар масоҳати 2 гектар барои нигоҳубини ниҳолҳо, дарахтон ва гулу буттаҳои ороишӣ парваришгоҳ сохта мешавад.

Ҳамчунин иттилоъ дода шуд, ки бо дастгирии Мақомоти иҷроияи ҳокимияти давлатии ноҳияи Восеъ ҳар ҳафта рӯзҳои шанбе бо иштироки кормандони ташкилоту муассисаҳо ҳашарҳои экологӣ  гузаронида мешаванд.

АКС: АМИТ «Ховар»