ҶОМИ ОСИЁ-2024. Дастаи мунтахаби олимпии Тоҷикистон (U-23) оид ба футбол пеш аз мусобиқа дар Давҳа ҷамъомади таълимиву тамринӣ мегузаронад

ДУШАНБЕ, 30.03.2024 /АМИТ «Ховар»/. Дастаи мунтахаби олимпии Тоҷикистон (U-23) оид ба футбол  ҳафтаи оянда дар Давҳа ҷамъомади ниҳоии тамринии пеш аз Ҷоми Осиё-2024-ро баргузор менамояд, хабар медиҳад АМИТ «Ховар» бо истинод ба Федератсияи футболи Тоҷикистон.

Марҳилаи ниҳоии омодагии дастаи мунтахаби олимпии Тоҷикистон 3 апрел дар Қатар оғоз мешавад. Ба ҷамъомади таълимии дарпешистода 25 бозигар даъват мегардад, ки 23 нафари он ба ҳайати ниҳоӣ дохил мешавад.

Бояд гуфт, ки дар Ҷоми Осиё-2024 дар Давҳа дастаи мунтахаби олимпии Тоҷикистон (U-23) дар гурӯҳи «С» бо дастаҳои мунтахаби Арабистони Саудӣ (16 апрел), Ироқ (19 апрел) ва Тайланд (22 апрел) неру месанҷад.

АКС: Федератсияи футболи Тоҷикистон