Ҳайати Тоҷикистон дар маҷлиси машваратии давлатҳои электорати ҷаласаҳои баҳории Хазинаи Байналмилалии Асъор ва гурӯҳи Бонки ҷаҳонӣ иштирок намуд
ДУШАНБЕ, 22.04.2024 /АМИТ «Ховар»/. Ҳайати Ҷумҳурии Тоҷикистон таҳти роҳбарии муовини аввали Сарвазири мамлакат Ҳоким Холиқзода дар Вашингтон дар маҷлиси машваратии мамлакатҳои электорати ҷаласаҳои баҳории Хазинаи Байналмилалии Асъор /ХБА/ ва гурӯҳи Бонки ҷаҳонӣ иштирок намуд.
Ба АМИТ «Ховар» дар Бонки миллии Тоҷикистон иттилоъ доданд, ки дар маҷлиси навбатии мамлакатҳои электорат масъалаҳои ноустувории молиявӣ дар ҷаҳон, таъмини суботи иқтисодӣ, сиёсати пулию қарзӣ бо назардошти хатарҳои геополитикӣ, беҳтар кардани дурнамои миёнамуҳлати рушд, таъсири номуайянӣ ва хатарҳо дар пасманзари муноқишаҳои давомдор баррасӣ гардиданд.
Роҳбари ҳайати Ҷумҳурии Тоҷикистон — муовини якуми Сарвазири мамлакат Ҳоким Холиқзода аз нақши Хазинаи Байналмилалии Асъор ва гурӯҳи Бонки ҷаҳонӣ дар рушди иқтисодию иҷтимоии Тоҷикистон ёдовар шуда, гуфт, ки маҷлиси машваратӣ аз лиҳози муколамаи бисёрҷониба ва омӯзиши таҷрибаи шарикии кишварҳои электорат ба ҳимояи манфиатҳои давлатҳои аъзо мусоидат намуда, ба сифат ва қабули фаврии қарорҳои муҳим барои мамлакатҳои аъзои гурӯҳ таъсири мусбат мерасонад.
Таъкид гардид, ки вазъи кунунии мураккаби геополитикӣ ба рушди иқтисодии давлатҳои минтақа, муносибатҳои байналмилалии тиҷоратӣ, бозорҳои молиявию ашёи хом дар ҷаҳон бетаъсир буда наметавонад. Гуфта шуд, ки бо назардошти сатҳи баланди номуайянӣ бояд роҳҳои нави таъмини устувории иқтисодиёт дар давраи ҷорӣ ва миёнамуҳлат ҷустуҷӯ карда шаванд.
«Бахшҳои молиявии минтақаи Осиёи Марказӣ дар нигоҳ доштани сиёсатҳое, ки ба ҳифзи иқлим дар минтақа нигаронида шудаанд, нақши муҳим доранд. Бо назардошти он ки воситаҳои қарздиҳии Хазинаи Байналмилалии Асъор барои қонеъ кардани ниёзҳои тағйирёбандаи давлатҳо пайваста такмил дода мешаванд, дастгирии Хазина дар таъмини маблағгузории дарозмуддати дастрас барои тағйирёбии иқлим ва таъмини рушди устувор мувофиқи мақсад шуморида мешавад»,- иброз намуд Ҳоким Холиқзода.
Дар анҷом Ҳоким Холиқзода аҳли нишастро ба ҷаласаи гурӯҳи электорати Хазинаи Байналмилалии Асъор ва Бонки ҷаҳонӣ, ки аз 1 то 3 июли соли 2024 дар Тоҷикистон гузаронида мешавад, даъват намуд.
АКС: Бонки миллии Тоҷикистон
Дар Тоҷикистон ҷамъоварии пахта бо маром идома дорад
Дар Корея рушди инноватсия ва технологияҳои рақамӣ дар Тоҷикистон муаррифӣ карда шуд
Дар Сеул байни КВД «Роҳи оҳани Тоҷикистон» ва Корпоратсияи роҳи оҳани Корея Шартномаи ҳамкорӣ ба имзо расонида шуд
35 СОЛИ ИСТИҚЛОЛ — 35 СОЛИ ШУКУФОӢ БО НЕРУГОҲИ БАРҚИ ОБИИ «РОҒУН». Таҳти чунин унвон чорабинии тантанавӣ баргузор гардид
Оид ба дастовардҳои соҳаи энергетикаи Тоҷикистон филми мустанад ба навор гирифта шуд
35 СОЛИ ИСТИҚЛОЛ. Дар Тоҷикистон беш аз 100 ҳазор гектар замин ба аҳолии мамлакат тақсим карда шуд
Дар Сеул байни вазоратҳои саноати Тоҷикистон ва Ҷумҳурии Корея Ёддошти тафоҳум ба имзо расонида шуд
Ширкати «LONGi»-и Чин барои бунёди неругоҳҳои офтобӣ дар Тоҷикистон сармоягузорӣ менамояд
Байни Вазорати молияи Тоҷикистон ва Бонки аврупоии таҷдид ва рушд Ёддошти тафоҳум ба имзо расонида шуд
Ҳамкории Хазинаи байналмилалии асъор ва Тоҷикистон баррасӣ гардид
ҚУРБИ АСЪОР: 1 доллари ИМА аз 9.1800 то 9.2523 сомонӣ муқаррар шудааст
Дар вилояти Хатлон 77 фоизи нақшаи содирот иҷро шуд
