Ҳамкории Вазорати тандурустӣ ва ҳифзи иҷтимоии аҳолии Тоҷикистон бо Агентии Амрико оид ба ҳамкории байналмилалӣ густариш меёбад

ДУШАНБЕ, 06.04.2024. /АМИТ «Ховар»/. Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо муовини ёвари маъмури Агентии Амрико оид ба ҳамкории байналмилалӣ (USAID) хонум Нидҳи Боури вохӯрӣ намуд, иттилоъ медиҳад АМИТ «Ховар» бо истинод ба Вазорати тандурустӣ ва ҳифзи иҷтимоии аҳолӣ.

Вазири тандурустӣ ва ҳифзи иҷтимоии аҳолӣ аз ҳамкории судманди Тоҷикистон ва Иёлоти Муттаҳидаи Амрико дар соҳаи тандурустӣ ва ҳифзи иҷтимоии аҳолӣ ёдовар шуд.

Таъкид шуд, ки Вазорати тандурустӣ ва ҳифзи иҷтимоии аҳолии мамлакат ҳамкориро бо Иёлоти Муттаҳидаи Амрико тавассути агентиҳои дахлдори он амалӣ менамояд. Аз ҷумла дар ин ҷода бо Агентии Амрико оид ба ҳамкории байналмилалӣ (USAID) ва Маркази назорат ва пешгирии бемориҳои сироятӣ (СДС) ёддоштҳои тафоҳуми ҳамкорӣ ба имзо расиданд, ки то соли 2025 амал менамоянд.

Дар идомаи мулоқот ҷонибҳо доир ба густариши ҳамкории вазорат ва ин Агентӣ дар самтҳои гуногуни соҳаи тандурустӣ мубодилаи афкор намуда, ҳавасмандиашонро дар ин самт баён доштанд.

Инчунин зимни мулоқот ҳарду ҷониб дар доираи Ташаббуси глобалии амнияти саломатӣ, ки Ҷумҳурии Тоҷикистон низ ба гурӯҳи давлатҳои аъзои он дохил аст, имконоташонро муҳокима намуданд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон