Дар Пекин масъалаи омодагӣ ба нишасти сарони Созмони ҳамкории Шанхай баррасӣ шуд

ДУШАНБЕ, 26.04.2024 /АМИТ «Ховар»/. Дар Пекин дар Котиботи Созмони Ҳамкории Шанхай ҷаласаи ҳамоҳангсозони миллии давлатҳои аъзои ин созмон баргузор гардид, хабар медиҳад АМИТ «Ховар» бо истинод ба котиботи Созмони Ҳамкории Шанхай.

Масъалаҳои омодагӣ ба ҷаласаҳои дарпешистодаи Шурои вазирони корҳои хориҷӣ ва Шурои сарони давлатҳои аъзои Созмони Ҳамкории Шанхай дар Остона, инчунин лоиҳаҳои санадҳои марбут ба ҳамкории бисёрҷониба дар бахшҳои сиёсӣ-дипломатӣ, тиҷоратию иқтисодӣ ва фарҳангию гуманитарӣ баррасӣ шуданд.

Ба баланд бардоштани сатҳи ҳамкории амалӣ дар доираи Созмони Ҳамкории Шанхай таваҷҷуҳи махсус зоҳир карда шуд. Дар ин замина доир ба замонависозии Созмон ва сохторҳои доимии он, инчунин таҳкими кор бо шарикони муколамаи Созмони Ҳамкории Шанхай ва иттиҳодияҳои байналмилалӣ табодули афкор анҷом дода шуд.

АКС: Котиботи Созмони Ҳамкории Шанхай дар Пекин