Лигаи Олӣ ва Лигаи якуми Тоҷикистон беҳтарин бозингар ва беҳтарин мураббии моҳи июнро муайян намуданд

ДУШАНБЕ, 08.07.2024 /АМИТ «Ховар»/. Лигаи футболи Тоҷикистон беҳтарин бозингару мураббиро дар моҳи июн дар Чемпионати Тоҷикистон-2024 маълум кард. Ҷоизадорони моҳи июн дар Лигаи якуми Тоҷикистон бо мукофотпулӣ дар ҳаҷми 2 ҳазор сомонӣ ҳар кадоме аз ҷониби Лигаи футболи Тоҷикистон қадрдонӣ мешаванд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Бозингари дастаи футболи «Хуҷанд»-и шаҳри Хуҷанд Исломҷон Тошпулотов беҳтарин бозингари моҳ эътироф гардид. Мавсуф дар се аз чор бозии дастааш беҳтарин бозингари дидор муайян шуда, 4 гол ба ҳадаф расонидааст.

Сармураббии дастаи футболи «Истиқлол»-и шаҳри Душанбе Никола Лазаревич беҳтарин мураббии моҳ эътироф шуд. Дастаи футболи «Истиқлол»-и шаҳри Душанбе зери роҳбарии ӯ, дар чор бозӣ 12 имтиёз ба даст оварда, пешсафиро дар ҷадвал нигоҳ медорад. Қобили тазаккур аст, ки ҷоизадорони Лигаи олии Тоҷикистон аз ҷониби Лигаи футболи Тоҷикистон бо мукофотпулӣ дар ҳаҷми се ҳазор сомонӣ ҳар кадоме қадрдонӣ мешаванд.

Ҳамчунин бо натиҷагирии моҳи июн Лигаи футболи Тоҷикистон беҳтарин бозингар ва беҳтарин мураббиро дар Лигаи якум-2024 муайян намуд.

Ҳамин тавр, ҳамлавари дастаи футболи «Моҳир»-и ноҳияи Ёвон Шоҳин Боев, ки дар панҷ бозии дастааш дар моҳи июн 4 маротиба беҳтарин бозингари майдон эътироф шудааст ва 8 гол ба нишон расонидааст, беҳтарин бозингари моҳ дониста мешавад.

Инчунин ӯ феълан беҳтарин нишонзани мусобиқа бо 10 гол аст.

Беҳтарин мураббии моҳ — сармураббии дастаи футболи «Саразм»-и шаҳри Панҷакент Раҳматулло Фузайлов мегардад. Зери роҳбарии номбурда, даста аз шаҳри Панҷакент дар панҷ бозӣ чор ғалаба ба даст оварда, як бозии дигарашро мусовӣ анҷом дод.

АКС: Федератсияи футболи Тоҷикистон