«Амонатбонк» барои вусъат додани ҳисоббаробаркунии ғайринақдӣ 1081 постерминалро фаъол намуд
ДУШАНБЕ, 03.08.2024 /АМИТ «Ховар»/. Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» барои дар амал татбиқ намудани Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркунии ғайринақдӣ», ки 22 июни соли 2023 ба имзо расид, инфрасохтори заруриро дар нозироти андоз ва филиалҳою марказҳои хизматрасонии бонкӣ дар тамоми ҷумҳурӣ фароҳам овардааст.
Раиси Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» Алиҷон Салимзода 2 август дар нишасти матбуотӣ зимни натиҷагирии фаъолияти «Амонатбонк» дар шашмоҳаи аввали имсол иброз намуд, ки «Амонатбонк» ба ҳолати имрӯза барои ба роҳ мондани пардохти ҳамаи андозҳо, боҷҳои давлатӣ ва намудҳои дигари хизматрасонии давлатӣ дар маҷмуъ 1081 постерминалҳоро дар тамоми филиалҳо, марказҳои хизматрасонии бонкӣ ва нозироти андоз фаъол намудааст.
Инчунин дар ташкилоту муассисаҳои давлатӣ ва бахши хусусӣ 3 ҳазору 870 постерминал насб карда шудааст. Барои хизматрасонии саривақтӣ ба мизоҷон беш аз 580 ҳазор кортҳои беноми «Фарогир» интишор гардида, ба филиалҳо дастрас шуданд.
Ҳамзамон барномаи мобилии бонк «Амонат-мобайл» қабули пардохтҳои ҳатмӣ ва ҳамгироиро бо иқтидори иттилоотии мақомоти давлатӣ ва бахши хусусӣ таъмин менамояд. Шумораи умумии истифодабарандагони ин барнома зиёда аз 990 ҳазор нафарро ташкил медиҳад.
Алиҷон Салимзода афзуд, ки дар замимабарномаи мобилии бонк «Амонат-мобайл» мутобиқати технологии хизматрасонии Кумитаи андоз, вазоратҳои корҳои дохилӣ, тандурустӣ, молия, маориф, Хадамоти гумрук ва дигар мақомоти давлатӣ анҷом дода шудаанд.
Илова бар ин барои анҷом додани хизматрасонии ғайринақдӣ дар саҳифаи расмии «Амонатбонк» равзана кушода шудааст. Дар бахши хусусӣ 1 ҳазору 196 ва дар муассисаҳои давлатӣ 1 ҳазору 560 QR-рамзи ягонаи Бонки миллии Тоҷикистон насб гардидааст, ки дар маҷмуъ 2 ҳазору 756 ададро ташкил менамоянд.
Бояд гуфт, ки Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркунии ғайринақдӣ» саривақтӣ буда, пеш аз ҳама, барои таъмини шаффофияти амалиёти молиявӣ, ғанӣ гардондани буҷети давлатӣ, пешгирии омилҳои коррупсионӣ ва коҳиш додани таъсири омилҳои инсонӣ заминаи мустаҳкам гузошта, барои баланд бардоштани рейтинги байналмилалии мамлакат ва ҷалби сармояи хориҷӣ шароити мусоид фароҳам меоварад. Инчунин гузариш ба низоми пардохтҳои ғайринақдӣ талаботи аҳолиро ба пули нақд коҳиш дода, навбатпоиро дар назди банкоматҳо ва хазинаҳои ташкилоти қарзии молиявӣ барои гирифтани пули нақд аз байн мебарад.
Ғайринақдӣ гардонидани раванди пардохтҳо аҳамияти муҳими иқтисодӣ дошта, истифодаи воситаҳои пардохти ғайринақдӣ ҳангоми анҷом додани пардохти хизматрасонии давлатӣ ин равандро осон ва мувофиқ мегардонад.
Марзия САИДЗОДА,
АМИТ «Ховар»
АКС: АМИТ «Ховар»
Раванди татбиқи лоиҳаи «Сохтмони лӯлаи газгузари Тоҷикистон-Чин, қисмати Д» баррасӣ гардид
БАРНОМАИ РУШДИ ПАРВАРИШИ ПАВЛОВНИЯ. Дар 72,5 гектар плантатсияҳои дарахти павловния бунёд карда шуданд
Дар хоҷагиҳои пахтакори ноҳияи Рӯдакӣ ҷамъоварии пахта оғоз гардид
Муовини Сарвазири Тоҷикистон бо корҳои кишоварзӣ дар шаҳри Ҳисор шинос шуд
Дар ноҳияҳои вилояти Хатлон ҷамъоварӣ ва коркарди пахта идома дорад
Бо иштироки муовини Сарвазири Тоҷикистон дар Шаҳринав ҷамъоварии пахта оғоз гардид
Дар Минск ҳамкории мақомоти дахлдори Тоҷикистон ва Русия дар самти муқовимат ба коррупсия баррасӣ шуд
Парвозҳои ҳавоӣ байни Душанбе ва Давҳа барқарор мегарданд
Дар Душанбе Конфронси панҷуми байналмилалии роҳдории Осиёи Марказӣ баргузор мегардад
Дар Панҷакент коргоҳи коркарди қуму шағал ва истеҳсоли бетон ба истифода дода шуд
Ҷаласаи навбатии Комиссияи байниидоравӣ оид ба таъмини бехатарии авиатсионӣ баргузор шуд
Намояндагони «Тоҷикаэронавигатсия» бо раванди таҳсили донишҷӯёни тоҷик дар Академияи давлатии авиатсияи Беларус шинос гардиданд
