Аз Тоҷикистон ба хориҷи мамлакат ба маблағи зиёда аз 990 миллион доллар маҳсулот содирот шудааст
ДУШАНБЕ, 05.08.2024 /АМИТ «Ховар»/. Дар шаш моҳи аввали имсол аз Тоҷикистон ба маблағи 997 миллиону 800 ҳазор доллар маҳсулот содирот шудааст, ки нисбат ба ҳамин давраи соли 2023 319 миллиону 200 ҳазор доллар ё 47 фоиз зиёд мебошад. Дар ин хусус зимни нишасти матбуотӣ директори Агентии содироти назди Ҳукумати Ҷумҳурии Тоҷикистон Баҳриддин Сироҷиддинзода иттилоъ дод.
Директори агентӣ афзуд, ки ҳаҷми содироти маҳсулоти саноатӣ дар ин давра 969 миллион долларро ташкил намуда, нисбат ба ҳамин давраи соли 2023 314,5 миллион доллар ё 48,1 фоиз зиёд гардидааст. Маҳсулоти кишоварзӣ дар ҳаҷми 77,1 ҳазор тонна ба маблағи 28,8 миллион доллар содирот шуда, нисбат ба ҳамин давраи соли 2023 4,7 миллион доллар ё 19,5 фоиз зиёд мебошад.
«Агентӣ дар ҳамкорӣ бо шарикони рушд баҳри зиёд намудани иқтидори содиротии ҷумҳурӣ тавассути таъсиси марказҳои тақсимоти яклухти маҳсулот ва корхонаҳои муштарак барои харид, захира, бандубаст, маҷмааҳои анбори нигоҳдории маҳсулот, аз ҷумла анбори нигоҳдории сарди маҳсулот, минтақаҳои омоданамоии пешазсодиротии маҳсулот, истгоҳи мошинҳои боркаш ва содироти минбаъдаи маҳсулоти кишоварзӣ тадбирҳои зарурӣ меандешад. Дар робита ба ин, қарори раиси ноҳияи Ҷайҳун оид ба ҷудо намудани 1,7 гектар қитъаи замин аз ҳисоби заминҳои дорои таъйиноти саноатӣ барои бунёди парки технологию логистикӣ қабул гардида, ҳоло масъалаи тарҳрезии инфрасохтори ин иншоот амалӣ шудааст»,-гуфт Баҳриддин Сироҷиддинзода.
Бо мақсади коркарди меваю сабзавот ва истеҳсоли афшураҳои табиӣ дар мавзеъҳои ҷойгиршавии боғоту токзор, инчунин минтақаҳои парвариши сабзавот, кам кардани талафоти ҳосили ғундоштаи маҳсулот Агентии содирот бо ширкати бонуфузи «Kreuzmayn Maschinenbau GmbH»-и Австрия аз рӯи масъалаи ба ҳудуди Ҷумҳурии Тоҷикистон ворид намудани корхонаҳои сайёри истеҳсолӣ, ки дар айни ҳол дар ҷумҳурӣ ҳамто надоранд, кор мебарад.
Ин технологияи муосир имкон медиҳад, ки таҷҳизот пай дар пай ба ноҳияҳои дурдасти мамлакат тавассути ядакҳои нақлиётӣ расонида шуда, дар ҷояш коркард ва резиши маҳсулоти тайёрро ба зарфҳои ассептикӣ анҷом диҳад. Маҳсулоти истеҳсолшуда босифат ва аз ҷиҳати экологӣ тоза буда, барои таъминоти талаботи бозори дохилӣ ва содироти минбаъдаи он ба хориҷи ҷумҳурӣ равона мешавад.
Раъно НУСРАТУЛЛО,
АМИТ «Ховар»
АКС: АМИТ «Ховар»
ИСТИФОДАИ САМАРАНОКИ ЗАМИН. Дар ноҳияи Ҷайҳун ҷамъоварии ҳосили сабзӣ аз кишти такрорӣ идома дорад
Дар Бонки миллии Тоҷикистон масъалаи сифати аудити берунаи ташкилотҳои суғуртавӣ баррасӣ гардид
Дар Душанбе татбиқи лоиҳаҳои муҳими стратегӣ дар соҳаи нақлиёт байни Тоҷикистон ва Чин баррасӣ гардид
«Саноатсодиротбонк» барои дастгирии соҳибкорӣ ва иқтисоди «сабз» «Иқдоми нав дар Соли нав»-ро роҳандозӣ менамояд
«Саҳифаи интернетии мутамарказ барои муқоисаи нархҳо/пешниҳодҳо»-и хизматрасониҳои молиявӣ таҳия карда мешавад
Байни Тоҷикистону Ҷопон Барномаи ҳамкории тиҷоративу иқтисодӣ барои солҳои 2026-2028 қабул карда мешавад
Доир ба имконоти рушди устувор ва сайёҳии экологии Резервати биосферии «Ромит» конфронси илмӣ баргузор гардид
Иҷрои «Стратегияи миллии мутобиқшавӣ ба тағйирёбии иқлими Ҷумҳурии Тоҷикистон барои давраи то соли 2030» натиҷагирӣ гардид
Дар вилояти Суғд ба маблағи беш аз 836 миллион доллар сармоягузории ватанию хориҷӣ ҷалб гардидааст
Воридоти панелҳои офтобӣ ба Тоҷикистон аз пардохти андоз аз арзиши иловашуда озод карда мешавад
Ғолибони озмуни «Ҷоизаи Ҳукумати Ҷумҳурии Тоҷикистон дар соҳаи сайёҳӣ» қадрдонӣ шуданд
Ҷаласаи муштараки кумитаи ҳамоҳангсози Амалиёт оид ба ислоҳоти андоз ва Шурои машваратии андозсупорандагон баргузор шуд
