ҲИСОББАРОБАРКУНИИ ҒАЙРИНАҚДӢ. 3,1 миллион амалиёти пардохти андозҳо ва боҷҳо ба тариқи ғайринақдӣ анҷом дода шуд
ДУШАНБЕ, 08.08.2024 /АМИТ «Ховар»/. Бо мақсади иҷрои талаботи Фармони Президенти Ҷумҳурии Тоҷикистон «Дар бораи тадбирҳои вусъат додани ҳисоббаробаркуниҳои ғайринақдӣ» нақшаи чорабиниҳои дохилиидоравӣ қабул гардида, тибқи он тадбирҳо андешида шуданд. Дар ин самт бо 19 бонки асосӣ «Оид ба тариқи ғайринақдӣ қабул намудани андозҳо ва дигар пардохтҳои ҳатмӣ» созишномаҳо ба имзо расонида шуда, барои бо дигар ташкилоти қарзии молиявии хурд ба имзо расонидани чунин созишномаҳо чораҷӯӣ мешавад. Дар ин хусус имрӯз зимни нишасти матбуотӣ Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода иттилоъ дод.
Нусратулло Давлатзода иброз дошт, ки барои шаҳрвандон ва андозсупорандагон имконият фароҳам оварда шудааст, ки бо истифода аз хизматрасонии эквайрингӣ, ҳамёни электронӣ ва пос-терминалҳо маблағи андозҳо ва боҷҳоро ба таври ғайринақдӣ ба буҷет пардохт намоянд. Дар шашмоҳаи якуми имсол тавассути пос-терминалҳо ва ҳамёнҳои электронӣ аз ҷониби шахсони воқеӣ ва соҳибкорони инфиродӣ дар маҷмуъ 3,1 миллион амалиёт оид ба тариқи ғайринақдӣ пардохт намудани андозҳо ва боҷҳо ба маблағи зиёда аз 1 миллиарду 82 миллион сомонӣ гузаронида шуд.
Дар ин давра шумораи андозсупорандагоне, ки эъломияҳояшонро ба тариқи электронӣ пешниҳод менамоянд, 9,5 ҳазор адад зиёд шуда, дар натиҷа беш аз 175 ҳазор субъекти хоҷагидор эъломияҳои худро тариқи электронӣ пешниҳод менамоянд, ки 70 фоизи шумораи умумии субъектҳои ҳисоботдиҳандаро ташкил медиҳад.
Дар баробари ин ба ҳолати 1 июли имсол барои андозсупорандагону шаҳрвандон 43 хизматрасонии давлатӣ дар шакли электронӣ пешниҳод гардида, ташкили чунин хизматрасониҳо ба содаю осон намудани иҷрои уҳдадориҳои андозии субъектҳои хоҷагидор ва коҳиш додани таъсири омилҳои инсонӣ мусоидат менамояд.
«Ҳамзамон барои рақамикунонии мақомот ва ташкили ҳамкорӣ дар сатҳи замонавӣ солҳои охир байни Кумитаи андоз, Вазорати молия, Хадамоти гумрук, Бонки миллӣ, Бонки давлатии амонатгузории «Амонатбонк», Кумитаи давлатии идораи замин ва геодезӣ, Агентии омор, Агентии хариди давлатии мол, кор ва хизматрасонӣ, Раёсати Бозрасии давлатии автомобилӣ ва якчанд мақомоти дигари давлатӣ созишномаҳо ба имзо расонида шуда, бо назардошти ташкили махзанҳои маълумот ва имконияти техникии вазорату идораҳо додугирифти маълумот дар шакли электронӣ қисман ба роҳ монда шуд. Барои тақвият бахшидани корҳо дар ин самт ва ба роҳ мондани ҳамкорӣ бо дигар вазорату идораҳо ва мақомоти давлатӣ чораҷӯиҳо идома доранд»,-гуфт Нусратулло Давлатзода.
Раъно НУСРАТУЛЛО,
АМИТ «Ховар»
АКС: АМИТ «Ховар»
Дар Душанбе масъалаи рушди технологияҳои рақамӣ ва ҳифзи кӯдакон дар муҳити рақамӣ баррасӣ гардид
Корхонаи коркарди пахтаи ноҳияи Фархор баъд аз таъмир ба истифода дода шуд
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
Дар Конфронси C5+1 SI дастовардҳои Тоҷикистон дар самти рушди зеҳни сунъӣ муаррифӣ шуданд
Коршиносони БОР соҳаи нақлиёт ва логистикаро яке аз муҳаррикони рушди иқтисодиёт арзёбӣ менамоянд
Байни Тоҷикистон ва палатаҳои савдою саноати кишварҳои ИДМ густариши робитаҳои тиҷоратӣ баррасӣ гардид
Барои фурӯши неруи барқ тавассути истгоҳҳои пуркунии воситаҳои нақлиёти барқӣ талаботи нав амалӣ гардид
ИСТИҚЛОЛИЯТИ ДАВЛАТӢ. То 1 октябр дар шаҳри Кӯлоб 493 иншооти истеҳсолию иҷтимоӣ ба истифода дода шудааст
Дар Минтақаи озоди иқтисодии «Кӯлоб» бинои гузаргоҳи гумрукӣ ва чоҳи амудӣ ба истифода дода шуд
