Дар арафаи ҷашни Истиқлоли давлатӣ дар Ҳисор Маркази адлия ифтитоҳ гардид

ДУШАНБЕ, 06.09.2024 /АМИТ «Ховар»/. Бахшида ба 33-солагии Истиқлолияти давлатии Ҷумҳурии Тоҷикистон ва Соли маърифати ҳуқуқӣ 5 сентябр дар шаҳри Ҳисор бо иштироки муовини Сарвазири Ҷумҳурии Тоҷикистон Дилрабо Мансурӣ дар вазъияти тантанавӣ бинои нави хуштарҳу замонавии Маркази адлия ифтитоҳ гардид, хабар медиҳад мухбири АМИТ «Ховар».

Бахши Сабти асноди ҳолати шаҳрвандӣ дар бинои хуштарҳу замонавии Маркази адлия ҷойгир шуда, аз ҳуҷраҳои бойгонӣ, роҳбарият, толори ақди никоҳ ва бойгонӣ иборат аст. Дар китобхонаи он асарҳои Пешвои миллат муҳтарам Эмомалӣ Раҳмон, теъдоди зиёди осори назмию насрии адибони маъруфи тоҷик, адабиёти ҳуқуқӣ, санадҳои меъёрии ҳуқуқӣ ва дастурҳои соҳавӣ мавҷуд мебошанд, ки аз он кормандони бахши Сабти асноди ҳолати шаҳрвандӣ ва сокинони шаҳр истифода мебаранд.

Иброз гардид, ки толори ақди никоҳ барҳаво буда, вобаста ба маросими баргузоршаванда оро дода шудааст. Дар толор барои сабти ақди никоҳи навхонадорон шароити муосир фароҳам мебошад.

Кормандони марказ шаҳрвандон ва корафтодагонро тибқи равзанаи нави электронӣ қабул менамоянд.

АКС: АМИТ «Ховар»