Дар ноҳияи Рӯдакӣ доир ба технологияи парвариши ангури ҷавз ва аҳамияти ғизоии он машварати ҷумҳуриявӣ баргузор шуд

Сентябрь 22, 2024 09:17

РӮДАКӢ, 22.09.2024 /АМИТ «Ховар»/. Дар Ҷамоати деҳоти Роҳатии ноҳияи Рӯдакӣ дар мавзуи «Технологияи парвариши ангури ҷавз (султонӣ) ва аҳамияти ғизоии он» машварати илмӣ-амалии ҷумҳуриявӣ баргузор гардид. Дар ин хусус  ба хабарнигори минтақавии АМИТ «Ховар» Субҳониддини Маҳмуд  дар Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Дар ҳамоиш иброз гардид, ки аз навъҳои гуногуни ангур, ки дар мамлакати офтобрӯяи мо парвариш карда мешаванд, навъи ҷавз (султонӣ) яке аз беҳтаринҳо ба шумор меравад. Ин навъи ангур дар водии Ҳисор парвариш меёбад. Ба иттилои ангурпарварон, ҷойи пайдоиши ин навъи ангур Ҷамоати деҳоти Роҳатии ноҳияи Рӯдакӣ буда, аз ҳамин лиҳоз дар ин минтақа нашъунамои хуб мекунад.

Аз қадим ангури ҷавз (султонӣ) бо шаклу ранг ва тамъи хоси худ бартарӣ дошт ва дар дастурхони шоҳон дида мешуд. Аз ин рӯ, ба он номи «султонӣ»-ро гузоштаанд. Ҳоло дар ҳудуди Ҷамоати деҳоти Роҳатӣ 265 га токзор мавҷуд мебошад, ки аз он 54 гектарро навъи ангури ҷавз (султонӣ) ташкил медиҳад.

Зимни машварат мутахассисони соҳа ва токпарварон оид ба роҳҳои дурусти парвариши ток, нигоҳубини он, ҷамъоварӣ, захира ва хушк кардани ангур сухан гуфта, ба аҳли ҷамоат маслиҳатҳои муфид доданд.

Мақсад аз баргузории машварати илмӣ-амалии ҷумҳуриявӣ дар мавзуи «Технологияи парвариши ангури ҷавз (султонӣ) ва аҳамияти ғизоии он» шиносоӣ пайдо намудан бо таърихи навъи нодири ангур, яъне ангури ҷавз, тарзи парвариш ва аҳамияти ғизоии он ба ҳисоб меравад.

Имрӯзҳо токпарварӣ ба яке аз соҳаҳои сердаромад табдил ёфта, саҳми он дар таъмини бозор ва мардум бо ангури хушсифат хеле калон мебошад.

Иштирокчиён дар хоҷагии деҳқонии ба номи «Қодир», ки ба Ҳаитмуҳаммад Каримов тааллуқ дорад ва дар 6 гектар ба парвариши ангури ҷавз машғул аст, бо тарзи омода намудани мавиз шинос шуданд.

АКС: Мақомоти иҷроияи ҳокимияти давлатии ноҳияи Рӯдакӣ

Сентябрь 22, 2024 09:17

Хабарҳои дигари ин бахш

Баҳодур Шерализода дар Самарқанд доир ба омодагӣ ба Конференсияи байналмилалии сатҳи баланд оид ба ҳифзи пиряхҳо маълумот дод
Дар шаҳри Душанбе иҷрои «Барномаи фишанги ҳамоҳангсозии сиёсат» баррасӣ гардид
Ҳаҷми гардиши савдои хориҷии Тоҷикистон ва Узбекистон соли 2024 1,74 маротиба зиёд гардид
Барномаи савдои электронӣ дар Тоҷикистон ба баланд бардоштани малакаи рақамию молиявии аҳолӣ ва соҳибкорон равона шудааст
Оё дар Тоҷикистон низоми кишти пунбадона тағйир меёбад? Шарҳи коршиносон дар ин мавзуъ
Дар шаҳри Гулистон Бизнес-форуми Тоҷикистон ва Тотористон баргузор гардид
Имконоти сайёҳии Тоҷикистон дар Намоишгоҳи байналмилалии сайёҳии «Лето-2025» муаррифӣ шуданд
Ҳайати Тотористон бо фаъолияти як қатор корхонаҳои саноатии вилояти Суғд шинос гардид
Дар ноҳияи Кӯшониён дар 320 гектар гармхона бунёд карда шудааст
Гармхонаҳои ширкати «Моғиён- агро»-и шаҳри Панҷакент бозорро бо сабзавоти тоза таъмин менамоянд
Хатмкунандагони Барномаи гузариши иқлимӣ соҳиби шаҳодатнома шуданд
Дар шаҳри Турсунзода бинои нави маъмурии Истгоҳи роҳи оҳани «Регар» ба истифода дода шуд