Дар доираи сафари кории Президенти Тоҷикистон ба шаҳри Турсунзода иншооти соҳаи тандурустӣ ба истифода дода шуданд

ДУШАНБЕ, 17.10.2024 /АМИТ «Ховар»/. Имрӯз дар доираи сафари кории Президенти Ҷумҳурии Тоҷикистон муҳтарам Эмомалӣ Раҳмон ба шаҳри Турсунзода иншооти соҳаи тандурустӣ ба истифода дода шуданд.

Тавре дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, имрӯз дар шаҳри Турсунзода аз ҷониби соҳибкори маҳаллӣ Зикрулло Маҷидов Маркази ташхисию табобатии «Ҳафиза» мавриди истифода қарор гирифт.

Ин иншооти навбунёди тандурустӣ аз 33 утоқи корӣ иборат буда, дар он 33 нафар бо ҷои кори доимӣ таъмин мешаванд. Марказ аз шуъбаҳои қабулгоҳ, ултрасадо, дандонпизишк, озмоишгоҳ, гинекология, физиотерапия ва ғайра иборат буда, дорои 66 кати табобатӣ мебошад.

Ҳамчунин дар ин рӯз Маркази ташхисию табобатии «Саномед» ба истифода дода шуд. Марказ аз 3 ошёна ва таҳхона иборат буда, дар он 37 утоқи корӣ мавҷуд мебошад.

Масъулин иброз доштанд, ки дар таҳхонаи иншооти навбунёд озмоишгоҳ, дар ошёнаи якум шуъбаи ташхисӣ ва стоматологӣ, дар ошёнаи дуюм шуъбаи ҷарроҳӣ ва дар ошёнаи сеюм шуъбаи табобатӣ ҷойгир карда шудаанд.  Шуъбаи ташхисии марказ бо таҷҳизоти муосири замонавӣ, аз қабили дастгоҳи ултрасадо, томографияи магнитӣ (МРТ), рентгени рақамӣ ва инчунин дастгоҳҳои дигари табобатӣ ҷиҳозонида шудааст.

Дар ошёнаи якум инчунин ҳуҷраи дандонпизишкии муолиҷавӣ бо 2 курсии дандонпизишкӣ ҷойгир аст. Шуъбаи ҷарроҳии марказ дорои 1 амалиётхона бо тамоми таҷҳизоти муосир, 1 ҳуҷраи интенсивӣ ва 6 ҳуҷра барои 12 бемор мебошад.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон